展示神奇文化的毛南族“分龙节”

□马志华 ingj/sij

6 nyied 14-16 hauh, Vanz- gyangh Mauznanzcuz Swciyen youq yienhsingz hoenghhwd gawj- hengz “Cungguek·Mauznanzcuz Cietfaenlungz” fungsug ndaw- biengz hozdung, aen yizsi “nabvaiz” gig miz daegsaek minzcuz、ruzlungz doxdax ciengz- mienh haenqhwd、fanh vunz daep mauhngeg humx feizdong diuq foux doengh gij vwnzyi ndawbiengz biujyienj caeuq dijyuz doxdax、gijgwn “haj rang” baijgai、cetyouz funghgingj gyaeundei dangdieg daengj hozdung angq hoh haenx yinx baenz geij fanh gak cuz ginzcung caeuq hekyouz ndaw gih rog gih bae yawjngonz caeuq camgya, ngoenzciet yiengq vunz- biengz baijyienj le gij vwnzva saenzgeiz、byaraemx gyaeundei caeuq yiengh gingjsieng moq huzndei hoenghhwd aen yienh neix.

Ciuq cam rox, cietfaenlungz dwg ngoenzciet conzdungj Mauz- nanzcuz mbaenj saenz baujyouh fungsou, dwg aen hozdung hungloet Mauznanzcuz moix bi cungj banh baez ndeu, youq moix bi liggaeuq gvaq ciet- hahceiq le ngoenzsaenz daih’it (ngoenzlungz) gonqlaeng gawj- hengz. Riuznaeuz ciuhgeq vunz Mauznanzcuz ndawde, goenggeq Samgyaiq dwg goengcoj ciengx vaiznoh Mauznanzcuz, caemh dwg boux canghyw ak Mauznanzcuz, de miz yienzfaenh ndaej baenzsien le, gawq ndaej vih gwnzbiengz diuzleix fwnrumz, caemh ndaej vih vunzbiengz ywbingh siucai, baujyouh vunzraeuz ndang cangq ndang rengz, ngaenz haeuj mbouj dingz, saehsaeh habhoz. Caeq goengsaenz Samgyaiq、mbaenj rumz dingh fwn yinz、gohaeux fungsou、vuenyungz ndang cangq、sim siengj daengz guh ndaej baenz, dwg hangh cujyau neiyungz cietfaenlungz Mauznanzcuz. Seiz- neix, cietfaenlungz Mauznanzcuz gaenq lied haeuj swcigih raeuz cib daih binjbaiz vwnzva cietgingq ndawde aen ndeu, daj 2009 nienz gvaqdaeuj, moix bi cungj gawj- hengz hangh hozdung neix. Cietfaenlungz bineix, cawz gawj- hengz yizsi “nabvaiz” caeqbaiq “ngoenzlungz” caeuq goengsaenz Samgyaiq Mauznanzcuz daengj fungsug ndawbiengz le, lij gawjhengz le ruzlungz iucingj doxdax、fanh vunz daep mauhngeg humx feizdong diuq foux、cingj gyoengq gicej bae gak aen gingjdenj gyaeundei daegbied haenx cetyouz guh senhconz daengj hozdung dem. Dieg ruzlungz doxdax, vunzlai caenx youq henz dah caengz dem caengz, vih 78 aen doih ruzlungz gungh 1023 vunz daj ndaw gih raeuz gak yienh caeuq Gvangjdungh daengj dieg daeuj haenx bek fwngz hemq gyayouz; youq gyanghaemh humx feizdong diuq foux yienhciengz, baenz fanh vunz daep mauhngeg ciengq ha diuq ha, daegsaek minzcuz naekgywggywg. Gyoengq bouxyawj angq dwk naeuz, cietfaenlungz mboujdan mizyinx, vanzlij dwg gij fungsug sibgvenq conzdungj beixnuengx Mauznanz- cuz ndawde cungj ndeu, moix bi ndaej yawjngonz mbat ciet- faenlungz hozdung ndeu caen dwg gienh saeh hawj vunz gig angqyangz ndeu.