□ 关仕京 搜集翻译

（接上期）

Sai: Song raeuz caez miz sim，

Gwnz rin bae ndaem suenq；

Gou dem mwngz dahnuengx，

Dwg ityiengh simdaeuz.

男：咱有心结伴， 种蒜在石上；

我和金妹你， 心思都一样。

Mbwk: Ciuq faenhgou aensim，

Dik rin guh baiz geiq；

Miz sim gyau mwngz beix，

Dai gvaqseiq menh lumz.

女：依照我心意， 刻石碑标记；

有心来交哥， 过世不忘去。

Sai: Raeuz caezgya mbouj lumz，

Dai roengz gumz cungj geiq；

Daj doq daenj buhceij，

Gaek sigbei aeu mingz.

男：咱俩不忘情， 死后仍记清；

就算穿纸衣， 刻石碑留名。

Mbwk: Mbouj lumz caez mbouj lumz，

Dai roengz gumz lij siengj；

Daj doq mbwn bibuengq，

Cungj mbouj siengj faenliz.

女：大家不忘去， 埋下还惦记；

即使天摇愰， 也不想分离。

Sai: Song raeuz gij cingzaen，

Mbouj naek gaen cungq buenq；

Dai bae cungj mbouj duenh，

Seizseiz siengj ndaw hoz.

男：我俩这情分， 没一斤也半；

死也不分开， 时刻记心坎。

Mbwk: Naek mbouj gaen cungj buenq，

Caez mbouj duenh cingzeiq；

Daihcaez mbouj faenliz，

Cien bi cungj geiqniemh.

女：重一斤或半， 不让情断线；

两人不分离， 千年都记念。

Sai: Song raeuz caez miz sim；

Dwk rin hwnq ranzlaeuz；

Miz sim gyau baengzyoux，

Byaek mbouj youz cungj feih.

男：我俩都有心， 破石起楼房；

诚心交朋友， 菜无油也香。

Mbwk: Song raeuz caen miz sim，

Aencingz laeg baenz haij；

Caen ndiepgyaez dahraix，

Raeuz cix byaij haemq deih.

女：咱俩真有心， 恩情深似海；

心十分相爱， 咱就勤往来。

Sai: Aeu caezgya miz sim，

Dub rin hwnq giuzgungj；

Daj doq laux gaemh dwngx，

Cungj bae rumj guhcaemz.

男：大家有心交， 打石建拱桥；

即使老扶杖， 也追去同游。

Mbwk: Raeuz baenzlai miz sim，

Aencingz mbouj hawj duenh；

Cibngux ronghndwen mbiengj，

Cungj mbouj duenh faenliz.

女：咱这般有意， 不让断情谊；

十五月亮缺， 也不会分离。

Sai: Deq daengz seizlawz bae,

Vafaiz ndaej ok aen；

Daengz seizlawz ha ngaenz，

Ndaej guhcaemz eu fwen.

男：要挨到哪天， 竹果枝头连；

等到几时呀， 同歌笑开颜。

Mbwk: Miz sim caez miz sim，

Miz cingz caiq miz eiq；

Song raeuz caez guhdoih，

Lau mbouj heih maz doengz.

女：有心同有心， 有意再有情；

咱俩结成对， 干啥都能行。

Sai: Daj caiq mingh mbouj hab，

Song raeuz gag doxhaengj；

Seiq neix gyau mbouj baenz，

Daengq daihlaeng yaek byaij.

男：即使命不合， 我俩仍相爱；

此生结不成， 嘱后辈重来。

Mbwk: Seiq neix mbouj baenz daemz，

Louz daihlaeng guh dah；

Caiq mbouj baenz gvanbaz，

Cungj doxcaj guhcaemz.

女：这辈不成塘， 留后世做河；

若不成夫妻， 也一起玩乐。

Sai: Ciengx bya ndaej caemh daemz，

Guhcaemz ndaej caemh luengq；

Caenh ndaej yienghneix nuengx，

Cij suenq raeuz miz sim.

男：养鱼同池塘， 玩耍共巷里；

能娶回阿妹， 才算有诚意。

Mbwk: Cawj byaek caemh mboenjgyu，

Go’mbu caemh daemz-

boengz；

Ronghndwen dem daengngoenz,

Doxgaen bae fatrongh.

女：煮菜同缸盐， 莲藕共泥塘；

太阳和月亮， 相随放光芒。

Sai: Miz baenz mbwn fwjheu，

Mboujmiz geu fwj cab；

Lajdeih miz vunz bak，

Song raeuz gag doxgyaez.

男：有全天蓝云， 没其它云彩；

地上人千万， 咱俩自相爱。

Mbwk: Song raeuz gag hab’eiq，

Fukheiq mbouj lau laeng；

Song raeuz ndaej doxgaen，

Dangq fwngz gaem ngaenz fanh.

女：咱俩都合意， 不怕福迟来；

我俩能相随， 胜万贯家财。

(caengz sat)