Vih gveihfan nem dungjyiz、doigvangq Sawcuengh youq sevei sawjyungh, geij ngoenz gonq, Nanzningz Si Cwngfuj cangzvu veiyi saemjlwnh doenggvaq 《Nanzningz Si Sawcuengh Sevei Sawjyungh Guenjleix Banhfap》(lajneix heuhguh《Banhfap》), yaek youq 7 nyied 1 hauh hainduj saedhengz. 《Banhfap》gveihding, gizdieg gunghgung cungyau haenx, gij baiz mingz wnggai caemh sij Sawcuengh nem Sawgun.

Roek giz caemh yungh

《Banhfap》gveihding, gij dieg、sezsih lajneix aeu caemh sij Sawcuengh nem Sawgun: Baiz sij mingz hingzcwng gihva; baiz nem gunghcangh guekgya gihgvanh、swyez danhvei; gij mingz vangjcan、bauqceij si、yienh(gih) cwngfuj; gij baiz gihcangz、hojcehcan、gicehcan、gangjgouj、sokruz、bozvuzgvanj、canj- lanjgvanj、duzsuhgvanj、dijyuzgvanj daengj gunghgung cangzsoj; gij baiz、fukvang veiyi nem hozdung hung youz si、yienh(gih) banh haenx; gij cingzgvang wnq wnggai caemh yungh Sawcuengh nem Sawgun haenx.

“Song saw”aeu sij doiq

《Banhfap》iugouz, gwnz sevei yungh Sawcuengh, wngdang byauh- cunj、gveihfan, cihsaw aeu sij liux、cingcuj. Caemh aen neiyungz he, eiqsei Sawcuengh nem Sawgun aeu doxdoengz.

Ciuq《Banhfap》gveihding, mbouj doengzseiz yungh Sawcuengh nem Sawgun, couh deng youq duenh seizgan he gaij doiq bae; danghnaeuz mbouj gaij dauq, couh gingjgau, caemh fadngaenz 500 maenz doxhwnj 1000 maenz doxdauq. Youq gizdieg sezsih gveihding venj baiz, sij saw、venj baiz、coq baiz mbouj doiq haenx, deng youq duenh seizgan he gaij doiq bae; danghnaeuz mbouj gaij dauq, couh gingjgau, caemh fadngaenz 300 maenz doxhwnj 500 maenz doxdauq.

Vujmingz Yen sawq hengz gonq

Ciuq cam rox, gaenh duenh seizgan Swcigih Minzyijveij yaek daihlig senhconz aen《Banhfap》neix, vanzlij gawjhengz beizyinbanh, cug- mbaek doihaeuj. Nanzningz Si Minzyijveij yaek dawz Vujmingz Yen dangguh aen yienh sifan yungh nem guenj Sawcuengh haenx, genj diuz baj song diuz gai okdaeuj, youq gwnz baiz gizdieg gunghgung cienzmienh sawj- yungh Sawcuengh nem Sawgun, vih daengx si sawjyungh Sawcuengh nem Sawgun daezhawj sifan cozyung.

Minzyijveij coengh cijdauj

Gij danhvei ciuq《Banhfap》gveihding aeu yungh Sawcuengh nem Sawgun sij baiz caeuq giyez nem vunz gyaez youq gwnz baiz sij Sawcuengh nem Sawgun haenx, baenzlawz gaij saw gwnz baiz? Nanzningz Si Minzyijveij coengh fanhoiz Sawcuengh, caemhcaiq cijdauj baenzlawz youq gwnz baiz coq song cungj saw.

Ciuq cam rox, youq《Banhfap》saedhengz bi he doxdauq, Swcigih Minzyijveij cujyau cijdauj、gaijndei baenzlawz yungh Sawcuengh guh, mboujduenh doihaeuj Sawcuengh ndaej doigvangq nem gveihfan.

(Lij Bingzbingz)