Bineix 6 nyied 11-13 hauh (liggaeuq ndwenngux coseiq daengz coloeg), aen hozdung bi 2013 Cingsih hawyw duenngux youq yienhsingz Cingsih hoengh banh, ciencien fanhfanh boux beksingq caeuq conhgyah yunghyw caenx haeuj hawyw, mbangj cienmonz daeuj cawx yw, mbangj daeuj cimh canghyw caeuq bouxndaemyw cam cihsiz yunghyw, lij miz mbangj dwg cienmonz daeuj hawyw “sup heiqhom goyw”. Caenh raen gwnz hawyw gak cungj gak yiengh yw baijlele yawj mbouj liux mbouj caenh, gij yinzsinh、hozsoujvuh、sizhuzlanz naenggyaemq daengj goyw dijbauj hawj vunz humx yawj, daengx aen hawyw heiqyw rangfwtfwt.

Ndaw gyaiq Cingsih dwg ranghdieg byarin, bya heu raemx saw, diegnamh dumznyinh, dwg gizdieg dijbauj hawj goyw maj ndei ndeu, lumj dienzcaet couhdwg daj gizneix cienz ok seiqlengq bae, maksanhcah aenloet dieg neix ndaem haenx mboujdanh ndaej gyangqdaemq lauzlwed, lij hamz miz gai lai, vunzlaux gwn le ndaej cangqndang; seizneix youh dwg goyw cinghhauhsu dajndaem gihdi; gij hozsoujvuh、vagimngaenz、luzvei aen yienh neix ndaemganq haenx caemh ndaem ndaej ndei. Doengh bi neix daeuj, aen yienh neix baengh aen binjbaiz hawyw duenngux, dingh ok youhvei cwngcwz, gyarengz fuzrex bouxseng- eiq caeuq nungzhoh, gyahung aen canjyez ywdoj, daengz bi 2012 nienzdaej, daengx yienh gungh ndaem dienzcaet、vagimngaenz、sizhuzlanz naengdiet、batgak、ducung daengj goyw menciz dabdaengz 5 fanh lai moux, dangnienz ndaej sou ywdoj ndip 2600 lai dun, dij ngaenz gyawj 2 ik maenz.

Cingsih hawyw duenngux moix bi banh baez ndeu, hainduj dwg youz gyoengq nungzminz ganjhaw gai yw menhmenh baenz hawyw, daj Ciuh- dangz Ciuhsung couh hainduj, daengz Ciuhmingz Ciuhcingh engq hoengh. Moix bi duenngux geizgan, gyoengq canghyw lajmbanj caeuq nungzminz Cingsih Yen, caiqlij canghyw ndaw- biengz caeuq nungzminz Dwzbauj、Nazboh、Denzdungh、Denzyangz、Denhdwngj、Dasinh nem Yinznanz、Yeznanz daengj dieg haenx foenxfoenx dawz gak cungj ywdoj bae gwnz bya vat aeu roxnaeuz gag ndaemganq haenx daengz yienhsingz Cingsih gai, moix bi baij baenz 5000 lai aen dan, miz mauhgvaq 1000 cungj yw, gaidoek mauhgvaq 400 dun. Gwnz hawyw cawz gaicawx yw le, gyoengqvunz lij lwnh gij gingniemh aeu Ywcuengh ywbingh, soncienz cihsiz Ywcuengh, doxvuenh dox- soengq cehfaen goyw, dwen ndaem- ganq goyw daengj dem. Doengzseiz, ndaw yienh lij cujciz guh gak cungj vwnzdij hozdung lumjbaenz gwihmax cwxcaih youzcet Cingsih、lajmbanj (segih) vwnzyi comzyienj daengj hozdung dem, hawj vunzlai angqyangz dwk sup heiqyw caenhcingz youzcet, nauhyied raixcaix.