Cunghyih nyinhnaeuz, daihsawq gwn bouj wng gwn bitgeq. Aenvih duzbit ciengzseiz youq ndaw raemx ra gwn, noh de bien liengz, gwn de ndaej nyinh yaem ciengx dungx、leih raemx siu foeg. Bitgeq yingzyangj ceiq lai, moix 100 gwz noh hamz miz 16.5 gwz danbwzciz, 7.5 gwz lauz, lij hamz miz gai、linz、diet、gak cungj veizswnghsu caeuq dansuij vahozvuz daengj yingzyangj cwngzfwn dem.

Duzbit ginggvaq seizdoeng caeuq seizcin song aen geiqciet le, goetndok maenghcangq, noh na noh saed. Haeuj daengz seizhah, ndang vunz deng ndat gug, gwn noix ninz siuj, ndang byom haujlai, siengj gwn bouj youh mbouj hab gwn gij huq daiq biz daiq nywnx haenx, gwn noh bitgeq bouj ndang ceiq habngamj mbouj gvaq lo.

Ciuq ndaw sawyw geiq naeuz, daihsawq gwn bitgeq, gawq ndaej bouj yingzyangj, youh ndaej siu hwngq, engq hab boux ndaw ndat、boux hwnjhuj、boux ndang hawnyieg、boux mbwq gwn caeuq boux baenz haex gengndongj gwn. Youq guek raeuz ndawbiengz, lij miz “daihsawq gwn bitgeq ndei gvaq gwn ywbouj” aen gangjfap naeuz. Sam bi bitgeq beij bit ngamq majdingh engq miz bouj. Aeu duz bitgeq sam bi ndeu, caiq dwk di denhmaz roxnaeuz dunghcungzyacauj he aeuq dang gwn, miz bingh yw bingh, fouz bingh cangq ndang, mboujmiz cungj huqbouj lawz beij ndaej de lo.