隆重欢乐热闹非凡的朝鲜族端午节

□Hanz Dunghyenz ingj Sinhyungz hoiz

Gij ngoenzciet Cauzsenjcuz ndawde, ndaej yawjnaek caemhcaiq ceiq hoenghhwd nauhyied haenx dwg cietduenngux. Liggaeuq ndwenngux co’ngux, doengh dieg Cauzsenjcuz gaenq gvaq le seiz hongnyaengq ndaemnaz, vunzraeuz ndaej angq- yangz caenhcingz gvaq ngoenzciet. Haet ndwenngux co’ngux daeng- ngoenz caengz okdaeuj seiz, gyoengqvunz Cauzsenjcuz couh doxiu bae rogdoengh mbaet aeu go’ngaih roxnaeuz gocanghbuj, maranz le venj saek gaem go’ngaih hwnj gwnz begdou bae, caiq dawz go’ngaih laenz baenz diuzcag venj laj yiemhranz dak hawq, bwh ngoenzlaeng guhyw roxnaeuz oenq nyungz gyaep non. Ciepdwk gyoengq mehmbwk couh nyaengqnyi’nyi dwk guh ceizdub、bingjduhheu、gaenx mienh daengj, guh haujlai gijgwn gig feih haenx daengx ranz vunz caemh gwn. Guh ceizdub gwn ceizdub dwg vunz Cauzsenjcuz cungj cungyau neiyungz angqhoh ngoenzciet ndeu, gij guhfap de lumj Bouxcuengh raeuz guh ceizndek nei, dawz go’ngaih caeuq haeuxnaengj cuengq roengz rumfaex bae, caiq yungh fagcuizfaex gaenzraez dub yungz rangfwtfwt le cij baenj baenz aen ceizdub, luj di mbalwgraz roxnaeuz mbaduh le baij youq ndaw deb, ndeiyawj youh feih. Dep laeuj gaeuq gwn ngaiz imq le, gyoengqvunz Cauzsenjcuz couh caez comz youq dieg gvangqbingz, hoenghhwd guh gij hozdung vwnzdij ndawbiengz conzdungj haenx, itbuen sien ciengq go diuq foux, lumjbaenz diuq fouxnungzloz, cungj foux neix hamz miz ngoddaz yozgi、ciengq go、diuq foux, dwg cungj yisuz biujyienj ndawbiengz fanjyingj caeqbaiq mbaenj fuk、 angqhoh fungsou ndaw swnghcanj swnghhoz lajmbanj, gungh miz “fouxgyong’iq” lwg- mbauq yienj、“daeb Lozhan” lwgnyez yienj、“fouxgyongbej” vunzlai diuq、“fouxgyongraez” mbwksai caemh diuq、“fouxbeizva” vunzlai caemh diuq、“fouxroegbeghag” hoh souhyienz caeuq “fouxmauhciengh” youz bouxsai ceiq doeklaeng yienj caemhcaiq ceiq ndeiyawj neix daengj 12 bouhfaenh, gyoengqvunz diuq foux riengz sing loxlez、aendigdaengj、gyonglaz angqyangz diuq mbouj dingz, biujdap aen nyienhmuengh gyaeundei cimhgouz gitndei vuenyungz, ciengzmienh hoenghhwd hailangh, daegsaek minzcuz yienhda. Dijyuz hozdung cujyau miz bi buengqyed、diuq benjndiengq caeuq doxbeg daengj, song hangh gaxgonq dwg mbwkcoz camgya lai, doxbeg dwg hanghmoeg saicoz yienj rengz ak. Diuq benjndiengq dwg aeu gep benj raez 5 mij baedauq ndeu, gaq youq gwnz gyaq sang 30 lizmij haenx, song boux vunz faenbied ndwn youq song gyaeuj, doxlwnz saetdiuq, boux roengz boux hwnj, diuq ndaej yied sang, yienj gij yienghsik haenx couh yied lai, vunzlai youq henz yied bek fwngz hemq ndei. Hanghmoeg doxbeg Cauzsenjcuz gig miz daegsaek, miz song cungj fuengfap doxbeg, youq gvidingh seizgan ndawde boux deng beg laemx lai couh saw. Youq gwnz ciengzdoxbeg, mboujlwnh dwg bouxdoxbeg roxnaeuz bouxyawj, cungj ndaej camgya doxbeg, lumjbaenz beij bouxlawz rengz ak uk gvai nei, yinx dwk vunzlai humx yawj caemhcaiq siengj sawq sadsad. Daj banhaet daengz gyanghaemh, daihgya caenh- cingz dwk guh’angq, ciengzmienh nauhyied raixcaix.