(ciep geizgonq)

“Cawz le mwngz mbouj guh, guh le couh deng vunz rox.”

“Gou roengz mbanj bae ra mou hani.”

“Byu”, Dunghmeiz biq gaemz myaiz he, naeuz: “Song bi gonq mwngz goj muenz gou, doeklaeng mbouj dwg deng gou gaemhdawz.”

“Mwngz vihmaz cungj dawz saeh gaxgonq daeuj gangj ni?”

“Ma couh dwg ma, gaij mbouj ndaej gwn haex.”

Daeggvan biengj rek mbouj raen haeux, biengj feiq mbouj raen byaek, cam:“Haemhneix baenzlawz mbouj cawj haeuxcaeuz?”

Dunghmeiz naeuz:“Gou mbouj fugsaeh bouxguhdoj!”

Daeggvan dawz aendaiz baez fan, gij vanj gij dawh gwnz daiz cungj sanq doek gwnz namh,vang raeh doxgyau.

Dunghmeiz naeuz:“Bae ba, bae guhdoj ba, ceiq ndei dai youq gwnz daizdoj haenx.”

“Boeb” sing ndeu, daeggvan fak Dunghmeiz mbat fak he.

Dunghmeiz goemq mbiengj naj deng fak manhsadsad haenx, maeg- saeg cim gvan haujlai nanz, raemxda lae dwk, yaep he, Dunghmeiz baenq ndang dauqlaeng, gebdawz daeglwg couh caij danci ok dou. Mbwn laepngaungau, nitsatsat, Dunghmeiz mbouj goq, cij goq ganjroen ma ranzmeh.

Seizneix, daengx ranz vunz cungj muengh daeggvan Dunghmeiz daeuj, yaek ndeindei ok gaemz heiq doeg he.

Ngoenz he gvaqbae, song ngoenz gvaqbae, aen singhgiz he gvaqbae lo, lij mbouj raen daeggvan Dunghmeiz daeuj. Daihgya roxnyinh miz di geiz- heih, daxboh caeuq daeggo naeuz Dunghmeiz lau dwg mwngz guhloeng de ba?

Youh gvaq bae cib geij ngoenz, daeggvan lij caengz daeuj, Dunghmeiz youq mbouj onj lo.

Daxboh caeuq daeggo mbouj caiq gangj gijmaz lo, daxmeh hix mbouj caiq ndaq lo, daihgya lumjbaenz muengh de caeux di daeuj ciep Dunghmeiz mehlwg baema ranz nei. Mehsauj Dunghmeiz naeuz: “Dahnuengx, ‘haq hawj gaeq riengz gaeq, haq hawj ma riengz ma’, youq ranz yah mbouj ndaej fat beizheiq lwgnyez, dauqbae ranz ba, baenzlawz gangj gizhaenx cij dwg ranz mwngz, gou caeuq daeggo mwngz doxceng, soqlaiz mbouj bae ranzmeh laihdai mbouj dauq bw.”

Dunghmeiz haemz gvan de mbouj hawj di naj hawj de, sawj de roengz mbouj ndaej daiz, bae dauq cungj mboujdwg. Dunghmeiz ndaw sim ndaq daeggvan, hoeng, de youh muengh gvan de vaiqdi daeuj ciep de, daiq de lizhai gizdieg gaenq mbouj dwg dieg de haenx.

Youh gvaqbae geij ngoenz, daihgya cij muengh daeuj daeggvan Dunghmeiz, daxmeh mbouj ndaq gvan de saek coenz, daeggo lij ndenq ien hawj de, daxboh hix riunyumnyum heuh de naengh gwn caz, daihgya lumjbaenz angqcoux bouxhek caj nanz ndeu.

Byaij ok mbanj seiz, daengx ranz vunz soengq bae haujlai gyae, seiq boux sai byaij youq baihnaj, Dunghmeiz caeuq yahmeh byaij youq baihlaeng.

Daeggo doiq gvan Dunghmeiz naeuz:“Dahnuengx gou maij fat beizheiq lwgnyez, youq ranz cungj dwg gou nyiengh de, baezlaeng mwngz nyiengh de di, mbouj gvaq mwngz moeb vunz hix mbouj deng.”

Daxboh naeuz: “Dahlwg gou daj iq couh cungh, gvaq saedceij miz gangj loek guh loek, mwngz gaej geiq youq ndaw sim, hoeng, mwngz moeb vunz gou couh mbouj haengj lo.”

Gvan Dunghmeiz cij dwg riun- yumnyum ngaek gyaeuj dwk.

Daxmeh doiq Dunghmeiz naeuz: “Miz bonjsaeh couh gaem dawz daeggvan youq gyangfwngz, sawj de dingq vah mwngz, miz di saeh couh buet ma ranzmeh, mbouj miz ceiqheiq, caiq gangj, byonghhwnz daiq lwg byaij loh, danghnaeuz ok maz saeh……”

Dunghmeiz ngaem gyaeuj byaij loh, dingq daxmeh gangj vah, seiz mbouj seiz ngaekngaek gyaeuj, rumzbaek ci luenh byoem de, de hix mbouj leix, lumjbaenz roxnyinh daengz gijmaz nei……

Dunghmeiz riuhehe caeuq vunz ranz vad fwngz doxbiek le, naengh hwnj baihlaeng danci daeggvan bae, got hwt daeggvan ndaetndetndet, aenloek danci cienqlulu, yiengq ranz daeggvan buet bae.(sat)