德昂族盛大的传统节日——泼水节

□Mangzsi ingj Sinhyungz hoiz

Moix bi ciet cingmingz gvaq geij ngoenz le, guek raeuz Yinznanz Swngj gyoengq beixnuengx Daijcuz Dwzangzcuz daengj saujsu minzcuz doengh dieg Dwzhungz、Sihsangh- banjnaz haenx caeuq gyoengqvunz Daigoz、Genjbujcai、Menjden daengj guekgya cungj angqyangz hoenghhwd gvaq cietbaeuhraemx, ngoenz haenx gyoengqvunz oenqhom caemxndang, cangndang moqsup lwenqda, raek- daiq gijgwn huqcaeq bae daengz ndaw miuh, cingj saenz caemx baed, aeu gij raemx siengcwngh gitndei haenx doxbaeuh hoh fuk, ciengz- mienh nauhyied raixcaix.

Cietbaeuhraemx Dwzangzcuz dieg Dwzhungz Couh dwg moix bi cietcingmingz gvaqlaeng ngoenz daihcaet hainduj, itbuen lienzdaemh gvaq 3 ngoenz, aenvih ngoenzciet miz gij hozdung bae gwnz ndoi mbaet vamoq, ndigah youh heuhguh “cietmbaetva”. Ngoenzciet geizgan, ndaw mbanj beixnuengx Dwzangzcuz sing gyongdinciengh yiengjdungdung, sing go sepsek haprwenz. Ngoenz daih’it haetromh, gyoengqvunz Dwz- angzcuz couh daenj dwk gyaeugetget riuj aenlamz hwnj ndoi mbaet vamoq, ndaw lamz cang rim le, gyoengqvunz couh naengh youq gwnz ndoi yietnaiq gangjgoj, seizneix, ciengzciengz couh miz sing gyongdinciengh caeuq sing lazmangz yiengj hwnjdaeuj, daihgya cix angq dwk diuq hwnj foux- dinciengh caeuq fouxgungjcoz, cig- daengz daengngoenz doekbya le cij angqangq riuriu maranz, daengz ndaw mbanj le gyoengqvunz lij doxsoengq gij vamoq mbaet ma haenx, hoh beixnuengx gitndei vuenyungz, bingzan doxhuz, caemh- caiq aeu vamoq nyub raemx le rwed hwnj gwnz siengqbaed bae swiq faenx, lij dawz baenz gaem baenz gaem vamoq baek roengz guenqva caeuq gwnz led ndaw gyanghongh bae. Doengxhaemh, gyoengq boux- coz doxcomz youq giz ndeu, angqyangz dwk ciengq go diuq foux, gij heiq ngoenzciet cw doh mbanjbya. Ngoenz daihngeih dwg ngoenz ceiq nauhyied cietbaeuhraemx. Haetromh, gyoengqvunz couh cangndang moqsupsup, gyoengq dahsau lij genj aeu duj vamoq ceiq lengj baek youq gwnz gyaeuj, daihgya daiq ceizhaeuxcid、geizfan、yienglab daengj doxgaiq caeqbaiq, soengq daengz ndaw miuh caeqbaiq saenz- baed. Seizneix, gyoengq saimbwk saenq baed haenx naengh youq ndaw miuh dingq goengbaed ngon ging, gyoengq mehmbwk lij dawz gij raemx aeu vamoq cimq gvaq haenx faet hwnj siengqbaed bae, heuhguh bang baed swiq faenx. Riengzdwk banh aen yizsi baeuhraemx, sien youz boux vunzlaux ndeu daj ndaw mbokraemx aeu gaem vamoq nyub raemx gvaq ndeu okdaeuj, faet raemx coh gyoengqvunz seiqhenz. Ciepdwk, gyoengqvunz youq ndaw sing gyongdinciengh gyukgyad haenx yaengx mbokraemx hwnjdaeuj, ndik raemx hwnj gwnz fwngz gyoengq vunzlaux bae, hoh vunzlaux ndang rengz souhyienz. Yizsi banh sat le, gyoengqvunz couh riengzlaeng aendoih gyongdinciengh, daeuj daengz henz mboq、henz dah, hainduj angqyangz dwk doxcaez baeuhraemx hwnjdaeuj, seizneix caenh raen raemx sinz daengz byongh mbwn, vunz youq ndaw raemx buet, nauhyied raixcaix. Ngoenz daihsam dwg gyoengq bouxcoz angqyangz seizgan, gyoengqde doxiu gap doih baeuhraemx gvaq le, couh foenxfoenx ra youx doxlienh、gangj gyaez dwen ndiep, daj giz gyae yawj bae, caenh raen gwnz ndoi henz dah, roxnaeuz haj roek boux guh doih, roxnaeuz baenz doiq baenz sueng, lumj baenz duj baenz nyup vamoq nei sanq youq rogdoengh, ndeiyawj dangqmaz.