欢乐独特的布依族“牛王节”

□Vangz Beizlen ingj Sinhyungz hoiz

Moix bi liggaeuq ndwenseiq cobet, gyoengq beixnuengx Buyihcuz cungj hoenghhwd gvaq ngoenzciet niemh goenglauz duzvaiz, ndigah “seiq nyied bet” caemh heuhguh “cietvaizvuengz”、“cietndaemnaz”. Ngoenz neix, gij mbanj Buyihcuz ranzranz cungj dumq raemx rongraeu swiq ndang duzvaiz, aeu nywjoiq gyaux haeuxnaengj seiq saek gueng duzvaiz, caiqlij gaj gaeq baiq saenzbaed caeq goengcoj, mehmbwk aemq lwg dauqma ranzmeh, baengz- youx doxcunz, ciengq go diuq foux, angqyangz gvaq ciet, maqmuengh daengx bi gohaeux fungsou doengh- duz maj vaiq.

“Seiq nyied bet” dwg aen cietheiq hongsaeh conzdungj youq- gaenj ndeu, gvaq ngoenz neix le dieg Buyihcuz couh yaek hainduj rauq naz ndaemnaz lo. Gaxgonq vunz Buyihcuz dajcae dawzrauq cungj gauq duzvaiz, duenh seizgan ndaemnaz duzvaiz ceiq dwgrengz lo. Gyoengqvunz vih hawj duzvaiz engq miz rengz dajcae dawzrauq, couh dingh youq ngoenz ndwenseiq cobet hawj duzvaiz ndeindei yietnaiq ngoenz he, riuz- naeuz ngoenz neix caemh dwg ngoenzseng vaizvuengz, ndigah beix- nuengx Buyihcuz moix bi ngoenz neix cungj caez gingq “vaizvuengz”, aeu nywjoiq suek haeuxnaengj seiq saek gueng duzvaiz, bang duzvaiz swiq ndang seuqsat, hawj duzvaiz yietnaiq ngoenz he, byaujsi gyoengqvunz gyaez vaiz gingq vaiz. Gyoengqvunz cawz naengj haeuxnaengj seiq saek le, lij gaj gaeq baij laeuj caeqbaiq caizsaenz caeuq goengcoj, mbaenj gouz ndaw bi guh gaiqgaiq swnh souhaeuj demlai. Ngoenzciet, gyoengq beixnuengx Buyihcuz cang ndang moqsupsup, daj seiq fueng bet baih comz daengz diegdangz、dieggvangqbingz henz mbanj, comz youq itheij angqangq yangzyangz roq gyong roq laz, boq luzswngh、aendig, ciengq go diuq foux, nauhyied raixcaix. Mbangj dieg lij banh vaiz doxdaemj、gwih max buet vaiq doxdax daengj vwnzdij hozdung dem, hawj vunzlai caenh- cingz yiengjsouh gij angqyangz ngoenzciet.

Ngoenzciet “seiq nyied bet” angqyangz nauhyied dwk gvaq sat le, beixnuengx Buyihcuz bouxsai couh cing vaiz gwed rauq bae ndaw naz dawzrauq, gyoengq mehmbwk cix daiq haeuxnaengj seiq saek bae daengz henz naz guh caeqbaiq gvaq le, couh hainduj ciemz gyaj ndaemnaz, aen geiqciet ndaemcin nyaengqnyi’nyi haenx couh baenz- neix hainduj lo.