——Guekgya Minzveij Hong Vah Saw Minzcuz Codanzvei Myabyawj

□bonjbauq gicej Vangz Sinhyungz ingj/sij

5 nyied 8-9 hauh, Guekgya Minzveij Hong Vah Saw Minzcuz Codanzvei youq gih raeuz soujfuj Namzningz Si hoengh hai, mizgven bu veij giz caeuq daengx guek gak swngjgih minzveij minzyijveij daengj mizgven danhvei boux dungzci fucwz nem doengh boux mizgven haenx gungh 120 lai vunz daeuj camgya haihoih.

Haihoih song ngoenz ndawde, gyoengq daibyauj camgya haihoih cungj gig nyinhcaen dingq lingjdauj guh gangjvah, doxcanj gyauhliuz gij gingniemh guh hong vah saw minzcuz, yaenglwnh ngoenzlaeng baenzlawz bae guh hong vah saw minzcuz ndaej engq ndei; daihgya daez genyi, ok geiqmaeuz, cungj nyienh vih hong vah saw minzcuz bae caenhsim caenhrengz; vanzlij mbouj lau roen gyae dwgrengz, naengh ci bae daengz Vujmingz cazyawj Gingloz Siujyoz aen hagdangz hengzguh Cuengh Gun song saw vah sonhag ndaej samcib lai bi caemhcaiq aeundaej cingzcik maenhndei neix, yawjngonz Daibingz Cin Ciet Swnjcienz Vwnzva Bouxcuengh hozdung, bae Vujmingz Yen Gvangjbo Densidaiz cazyawj cezmuz Vahcuengh loegguh ingjcuengq cingzgvang, bae Gvangjsih Minzcuz Bozvuzgvanj yawjngonz cazyawj. Gyoengqde bae daengz giz he, gizde couh miz sing fwen angqcoux, sing deihdeih haenhdanq, lij miz sing maqmuengh dem, hawj vunz roxnyinh ndawsim raeujrugrug, angqyangz vuenheij.

Aenhoih yienznaeuz haisat lo, hoeng gyoengq daibyauj camgya haihoih cungj naeuz souhaeuj lairaeuh, ngoenzlaeng guh hong vah saw minzcuz engq miz saenqsim, caemh roxnyinh diuzrap gwnz mbaq naekgywggywg, doxdaengq naeuz gvaq duenh seizgan he, angqcoux daihgya bae daengz dieg bonjfaenh yawjyawj.