武鸣县太平镇壮族文化传承节：展示壮族文化风情

Bonjbauq siusik (gicej Vangz Sinhyungz) Haeuj hah va hai angj, raeuz sim’angq dakdaih; ngoenzneix hekgviq lai, fwen roedraih rwenzhap. 5 nyied 9 hauh banhaet, Bi 2013 Vujmingz Yen Daibingz Cin Ciet Swnjcienz Vwnzva Bouxcuengh youq ndaw cin neix Gingloz Siujyoz hoengh banh. 120 lai boux daibyauj daeuj Namzningz camgya Guekgya Minzveij Hong Vah Saw Minzcuz Codanzvei haenx ganj bae daengz yienhciengz, caeuq baenz fanh boux hek daj ndaw gih gak dieg daeuj haenx nem ganbu ginzcung dangdieg angqvauvau dwk yawjngonz vwnzyi byaujyenj, camgya gak cungj vwnzdij hozdung, nauhyied raixcaix.

Baez hozdung neix miz eu fwen、yienj heiq conzdungj Bouxcuengh daengj vwnzyi byaujyenj, miz dwkgyangq、dwkdomq、ringx hongxdiet daengj minzcuz dijyuz doxdax, miz yienhciengz duk faengx、naengj haeuxnaengj haj saek、guenq saejmou daengj gijgwn daegsaek Bouxcuengh, lij baijyienj daem rongraeu、muh haeuxyangz、gonh raemx daengj doenghgij ciengzmienh guhhong gaeuqgeq neix, hawj gyoengq hekgviq roxyiuj vwnzva Bouxcuengh goek laeg rag raez, lai cungj lai yiengh.