Seizcou banhaet, mbwn lamzsisi, gou gag hai ci coh ranzcoj buet bae.

Bi lai mbouj dauq ranzcoj lo, seizneix ndawsim miz di gikdoengh. Gij oij song henz roen haenx gaenq maj ndaej heuswdswd, raq rumzcou ci gvaqdaeuj, mbaw oij yiengjsasa, couhlumj ciengq go nei. Dinndoi dwg doenghnaz, gij haeux henjswdswd ndaw naz haenx fan hwnj caengz- caengz “langh iq”, ndeiyawj dangq- maz. Bineix youh dwg bi haeux fag maek baenz ndeu!

Yaep he, aenci gou gaenq baenq haeuj diuz lohsuijniz moqsagsag youh bingz youh soh he bae. Song henz loh ndaem miz song baiz gofaex, rumz ci gvaqdaeuj, mbawfaex bi bae bi dauq, couh lumj angqcoux bouxhek haeuj mbanj daeuj nei! Mbouj sijsaeq yawj, gou caen laihnaeuz byaij loek roen dem, gou caen miz di mbouj saenq, diuz roen neix couh dwg diuzroen ranzcoj dou.

Ranzcoj caeuq daihloh gek miz caet goengleix gyae. Gaxgonq haeuj mbanj cij miz diuz roennamh iq sam mij gvangq he. Gyoengq vunzmbanj bae haw, lwgnyez bae hag cungj dwg byaij diuz roen neix. It bae ngeih dauq, diuz roen neix bienqbaenz diuz roen yamq din couh miz sam aen gumz ndeu. Ngoenzndit, faenx mbinfofo, ngoenz doekfwn, gwnz roen boengz- myagmyag, vunz byaij ra dieg cuengq din cungj mbouj miz.

Aenvih mbouj doeng loh, gij doxgaiq ndaw mbanj mbouj miz banhfap gai ok rog bae, cijndei gag ndaem gag gwn; mou yiengz cwz vaiz caeuq bit gaeq ciengx hung le hix gai mbouj ndaej gyaqcienz.

Miz vah naeuz:“Aeu miz ngaenz, sien doeng roen”. Bi’gvaq ndaw yienh gijdung guh goengloh suijniz gunghcwngz, doenggvaq yienh caiz- cwng ok faenh ngaenz he, vunz mbanj ok faenh he, heuh daengx mbanj haigoeng guh roensuijniz. Gyoengq- vunz ranzcoj cungj angqyangz hwnjdaeuj lo, mwngz sam bak, gou haj bak gien cienz okdaeuj guh goengloh. Dingqgangj diuz roensuijniz neix cij yungh ndwen lai couh guh baenz lo.

Seizneix miz diuz loh neix le, ndaw mbanj ranzranz cawx ci mozdoz, mizmbangj lij cawx cifanghdoh dem, daengx ngoenz bae dauq dawz gij doxgaiq gag ndaem ndaej haenx bae haw gai, daehcienz ngoenz beij ngoenz bongz, saedceij ngoenz beij ngoenz ndei. Ndaw mbanj ranzlaeuz aen rangh aen, ciengz hau lumj siet, cueng ndongq gingq loeg, dingjlaeuz lij nem miz vax henj dem, daj gizgyae yawj bae, gwnz henj laj hau, gyaeundei lumj fukdozveh……

Gou ndwn youq gyaeujmbanj, yawj diuzroen ranzcoj neix, gikdoengh raixcaix: Diuz roen ranzcoj neix yaek yinx vunzmbanj byaij hwnj diuzloh fouqmiz, gyoengq vunzmbanj saedceij yaek yied gvaq yied hoenghhwd.