黎族最盛大的民间传统节日“三月三节”

□Dwng Meijbinh ingj Sinhyungz hoiz

Ciet sam nyied sam dwg ngoenzciet angqyangz hoenghhwd gyoengq beixnuengx Lizcuz Haijnanz Swngj, caemh dwg ngoenzndei rayoux damzcingz gyoengq bouxcoz Lizcuz, youh heuhguh cietdoxgyaez、cietdamzyoux, moix bi liggaeuq ndwensam cosam hoengh banh, dwg ngoenzciet conzdungj beixnuengx Lizcuz caeqbaiq goengcoj、siengj- muengh saedceij vuenyungz ndeu.

Daj ciuhgeq daeuj, moix bi ngoenzciet sam nyied sam, beixnuengx Lizcuz cungj cangndang moqsup gyaeuget, rap laeujhaeux Sanhlanz, raek haeuxhom mbok- faexcuk, daj seiq fueng bet baih comz daengz giz ndeu, caeqbaiq goengcoj, doxhumx dwk ciengq go diuq foux、doiq fwen、doxbeg、bengcag、nyingz naq、buengqyed, angqangq yangzyangq gvaq ngoenzciet; doengxhaemh, gyoengq bouxcoz diemj dawz baenz dong baenz dong feizdong, hopheux feizdong angq diuq fouxsaux、fouxbinhlangz daengj gofoux minzcuz, nauh daengz ranzrongh lij angq mbouj dingz.

Seizneix, ciet sam nyied sam gaenq baenz aen hawhoengh dieg beixnuengx Lizcuz vwnzva yizloz、sanghmou lijyouz、dijyuz doxdax ndeu, cawz yienhciengz baijyienj gij dinfwngz conzdungj maenhndei Lizcuz lumjbaenz dinfwngz daemj- rok、dinfwngz cuenq faex diemj feiz daengj feihvuzciz vwnzva yizcanj Lizcuz le, lij guh nyingz naq、daenj haizgiegraez buetvaiq daengj dijyuz doxdax hozdung. Bineix sam nyied sam geizgan, Haijnanz Dunghfangh Si、Gingzcungh Yen、Bwzsah Yen、Baujdingz Yen daengj beixnuengx Lizcuz Myauzcuz comzyouq haenx, cungj banh le yienj gofoux、dijyuz ndawbiengz doxdax、doiq fwen daengj gij hozdung miz daegsaek saujsu minzcuz neix, hawj gyoengq beixnuengx dangdieg caeuq gyoengq hekyouz gamjsouh daengz gij vwnzva conzdungj naekgywg Lizcuz Myauzcuz, haujlai hekyouz caemh camgya diuq fouxsaux、nyingz naq、sawq daemjrok daengj hozdung bae, gamjsouh gij angqyangz ngoenzciet, sim’angq raixcaix.