5 nyied 2 hauh banhaet, Swcigih Dangjveij、Cwngfuj youq Nanzningz ciuhai “Gvangjsih Gyaeundei·Lajmbanj Seuqsak” hozdung densi dungyenz daihhoih. Swcigih Dangjveij suhgi Bungz Cinghvaz、 Swcigih cujsiz Cinz Vuj、Swcigih Dangjveij fusuhgi Veiz Cauzanh camgya dungyenz daihhoih. Aenhoih naeuz, gih raeuz aeu youq ndaw song bi, doiq daengx gih lajmbanj guh baez “baet seuqsak” ndeu, sawj lajmbanj mbwn seizseiz lamz、raemx seizseiz saw、faex seizseiz heu、gwnzdieg seizseiz seuqsak. Youq ngoenzde lajbyonghngoenz, Nanzningz Si youq Sanhdangz Cin Mbanjmungzcunh gawjhengz “Nanzningz Gyaeundei·Lajmbanj Seuqsak” ngoenz caez hengz- doengh daih’it, heuh vunzlai hengzdoengh hwnjdaeuj, dawz lajmbanj baet seuqsak bae. Hozdung hainduj ngoenzde, daihgya couh youq aendieg cwzyingih swhgeij baet nyapnyaj, guh ndaej hoenghhwdhwd.

（Yangz Cwngyingz）