□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Mboujgvaq, aen Yungzyen dieg youq baihnamz Guengjsae neix, mbouj souh mbangj “gohyoz dinghlwnh” haenx haedcug. Vih- liux gaijgez yungh bwnh vwndiz, yenveij fusuhgi Dingh Saulanz youq yenveij suhgi Cangh Dazmingz dingjrengz lajde, daj bi 1960 seizdoeng haidaeuz, cix daiqlingx gyoengq boux nungzyez gohgi guh gij sawqniemh sawq ndaem go- nywjvahoengz caeuq gomaenz. Ceh daj Gyanghsih yinx haeuj, lij daj Gyanghsih cingj nungzyez gisuzyenz daeuj son. Baez daih’ it sawq ndaem mbouj baenz, 6900 lai moux naz, daengz bi 1961 seizcin cij miz 1.2% maj ndaej ndei di. Gyoengqde youq boux conhgyah Swcigih Nungzyez- dingh caeuq boux nungzminz Gyanghsih bangcoh lajde, ra ndaej ok le aen vwndiz ndaem mbouj baenz haenx. Gij go’nywjvahoengz maj ndaej ndei haenx, rag giet miz raetfoegrag; gij go maj mbouj ndei haenx ne rag mbouj miz raetfoegrag. Yenzlaiz go’nywjvahoengz caeuq gomaenz daengj doenghgo goduh haenx caeuq raetfoegrag caemh sengmaj. Raetfoegrag daj gij doenghgo goduh gizde cup yingzyangj caeuq raemx, doengzseiz de youh dinghmaenh youzlizdansu ndaw hoengqheiq gungh hawj doenghgo goduh majhung. Danghnaeuz go’nywjvahoengz caeuq gomaenz mbouj miz raetfoegrag bang de cauh gij vahozvuz hamz dan haenx nei, de cix lumj lwgnyez noix yingzyangj byombyetbyet ndeu.

Ra deng gij yenzyinh le, bi 1961 seizdoeng, gyoengqde youq Nungzyezdingh dinghcangj Se Dunghlaiz dingjrengz baihlaj, laeb- daeb sawq ndaem 500 lai moux, daj Huznanz cawx raetfoegrag go’nywj- vahoengz ma guh gyauxndaem, caemhcaiq vat mieng baiz raemx、youq laj gohaeux doekceh、cuengq bwnhlinzfeiz. Bi 1962 seizcin, gofoeg miz 71% maj ndaej ndei, ceiq noix moux goj ndaej 2000 gaen, itbuen moux canj 6000—7000 gaen, moux ceiq lai mauhgvaq fanh gaen. Yungh bwnhfoeg daeuj guh bwnhdaej nazhaeux, moix 1000 gaen bwnhfoeg ndaej demsou 50 daengz 100 lai gaen haeux, namh naz hix bienq biz dem.(caengz sat)