老山羊

Ciuh yiengzbya geq youq ndaw ndoeng gvaq. Yiengzbya geq miz haujlai lwg, boux riengz boux bae ndawsingz bae lo. Seizneix, yiengzbya geq caeuq dahlwg ceiq iq doxbaengh gvaq saedceij.

Gyoengqlwg youq henzndang seiz, yiengzbya geq caeuq gyoengqlwg gangj vah duzyiengz. Bouxvunz youq henz ndang seiz, yiengzbya geq dingq bouxvunz gangj vah, dingq lai le, yiengzbya geq hix rox vah bouxvunz. Bouxvunz caeuq duzyiengz caez youq nanz le, bouxvunz hix rox gij vah duzyiengz.

Seizneix, dahlwg iq yiengzbya geq hix majhung lo. Ndawsingz miz vunz daeuj, naeuz daiq dahlwg iq yiengzbya geq bae ndawsingz.Yiengzbya geq rox dahlwg iq bae ndawsingz le, couh bienqbaenz noh ndaw buenz vunz lo.Yiengzbya geq raemxda doekbyoegbyoeg.

Bouxcawj naeuz:“Duzyiengz ha, dahlwg gou baenzbingh lo, cijndaej aeu dahlwg mwngz daeuj vuenh cienz ywbingh lo!”

Yiengzbya geq naeuz:“Dahlwg gou bae ndawsingz couh mbouj miz mingh lo! Gou gaenq geq lo, hix mbouj ndaej seng yiengzlwg lo, danghnaeuz dahlwg gou lij lix, ndaej seng yiengzlwg le, gou miz daeglan, lij miz duzyiengz ne. Mbouj miz dahlwg, daengz gou dai le, yienghneix couh mbouj miz duzyiengz lo!”

Bouxcawj naeuz:“Gou dan miz dahlwg neix, gou maqmuengh dahlwg ndangcangq, gou hix siengj umj lan ha.”

Yiengzbya geq naeuz:“Mboujnex, gou bae ndawsingz, vunz ndawsingz ciengzseiz naeuz, hix miz vunz maij ndoet dang yiengzbya geq. Dan miz bouxcawj mwngz naeuz gou seng yiengzlwg lai, gou cij ndaej lix daengz ngoenzneix.”

Couh yienghneix, yiengzbya geq haeuj ndawsingz bae lo.

Youq ndaw diemqngaiz, yiengz- bya geq caeuq haujlai yiengzlwg doxbuenx.

Yiengzlwg duzduz cungj daej dwk, gyangz diuzmingh swhgeij yaez lai.

Yiengzbya geq gig simdingh.

Duz yiengzlwg ndeu doiq yiengz- bya geq naeuz:“Bouxlaux, mwngz baenzneix simdingh, mbouj lau dai ha?”

Yiengzbya geq naeuz:“Yiengz cungj aeu dai. Daj okseng ngoenz haenx, couh gietdingh cungj miz ngoenz ndeu aeu dai. Mwngz daej dwk lau dai, mboujyawz haisim gvaq ngoenz ndeu. Gou you, bouxvunz ngoenz gaj baenzlai duzyiengz, lauheiq miz ngoenz ndeu mbouj miz duzyiengz lo.”

Yiengzlwg naeuz:“Raeuz gwn nywj, mbouj yungzheih maj baenzlai noh, couh deng bouxvunz gwn bae, gou mbouj fugheiq ha!”

Yiengzbya geq naeuz:“Youq laj fagcax bouxvunz, raeuz cijndaej swenj lo.”

Yiengzlwg duzduz simdingh ndwn dwk.

Mbwn lij caengz rongh, song bouxcoz dajcawj gaemh duz yiengzlwg ndeu bae lo, yaep he, yiengzlwg swenj dwk. Song bouxcoz dajcawj youh daeuj gaemh duz yiengzlwg ndeu, yaep he, yiengzlwg swenj dai swenj lix.

Yiengzlwg duz daep duz deng gaemh bae lo, ndaw loengz youh dem haujlai yiengzlwg.

Saedceij ngoenz gvaq ngoenz, boux dajcawj lij caengz gaemh yiengzbya geq.

Youq ndaw loengz, yiengzbya geq raen aen cingzgvang hawj de siengsim ndeu. Henz loengz miz aen ganghung cang byaeklw ngaizlw he. Gyanghaet, aengang hoengq, daengz banngaiz le, aengang cungj rim liux, ndawde miz haujlai nohyiengz caeuq ndokyiengz, miz vunz dawz deuz le, youh cuengq aengang hoengq youq gizde, daengz gyanghaemh, aen ganghung neix youh rim lo, ndawde youh miz haujlai nohyiengz caeuq ndokyiengz.

Yiengzbya geq siengj: Bouxvunz gaj duzyiengz muzdiz couhdwg gwn nohyiengz, gwn noh mbouj gwn ndok couh suenq lo, vih gijmaz lij lw baenzlai nohyiengz, langfei haujlai duzyiengz. Danghnaeuz cungj gwn nohyiengz liux bae, couh mbouj yungh gaj baenzlai duzyiengz lo. Yienghneix couh miz haujlai yiengzlwg mbouj dai, gyoengqde couh ndaej sanj haujlai yiengzlwg daeuj lo.

Yiengzbya geq ndwn youq gizhaenx ngaez liux.

Ngoenz ndeu banhaet, boux daj- cawj laux ndeu byaij haeujdaeuj, ndwn youq baihnaj yiengzbya geq yawj dwk, yiengzbya geq hix yawj bouxdajcawj.

Bouxdajcawj laux guh dajcawj baenz ciuhvunz lo. Lij coz seiz, de mbouj rox gaj geijlai duzyiengz, de rox gij vah duzyiengz. De gamjdaengz duzyiengz hojlienz lai lo, caiq mbouj nyaenxsim gaj duzyiengz.

Bouxdajcawj laux naeuz:“Gou mbouj nyaenx sim gaj mwngz, hoeng bouxdajcawj coz naeuz lau yawj fajnaj deng gaj mwngz, gouz gou daeuj gaj mwngz lo.”

Yiengzbya geq naeuz:“Yiengh- neix couh daeuj ba, duzyiengz bonjlaiz couh dwg hawj bouxvunz gwn. Hoeng gou miz aen vwndiz ndeu mbouj rox, gou daeuj gizneix baenzlai ngoenz lo, vih gijmaz ngoenzneix cij gaj gou?”

Bouxdajcawj laux naeuz:“Boux daeuj gwn nohyiengz haujlai cungj dwg bouxcoz, bouxcoz maij gwn yiengzlwg, yiengzlwg noh oiq! Ngoenzneix banngaiz miz boux hek ndeu naeuz siengj gwn dang yiengzbya geq.”

Yiengzbya geq naeuz:“Gaem cax ba.”

Bouxdajcawj laux hai aenloengz, yiengzbya geq swhgeij byaij okdaeuj lo.

Faggiemq yaek yoek haeuj conghhoz yiengzbya geq seiz, boux dajcawj coz ndeu swenj naeuz：“Dingz roengzdaeuj gonq!”

Yiengzbya geq dingq boux dajcawj coz naeuz, bouxhek aeu mbaetgwn, banringz mbouj daeuj gwn ringz lo.