“四月八”——苗族同胞盛大的联欢节

□Lungz Hinghcungh ingj Sinhyungz hoiz

Moix bi liggaeuq ndwenseiq cobet dwg gij ngoenzciet conzdungj Myauzcuz ndawde aen ciet lienzvuen hoenghhwd ndeu. Ngoenz haenx, gyoengq beix- nuengx Myauzcuz cungj cang- ndang moqsup gyaeuget caez daeuj daengz diegnywj diegdangz, angqyangz dwk ciengq go diuq foux, guh gak cungj gak yiengh hozdung, ciengzmienh hoenghhwd nauhyied, ndaej heuhguh ciet caeq cojcoeng、ciet yinghyungz、ciet lienzvuen beixnuengx Myauz- cuz, hamz miz gij cingsaenz minzcuz caeuq vwnzva minzcuz nanwt laeglwd.

Ciet “ndwenseiq cobet” Myauzcuz dwg daj gij hozdung caeqbaiq bienq daeuj, caeq mbwn caeq deih caeq cojcoeng, caeqbaiq yinghyungz caeq saenz- lingz, riengzdwk seizdaih boek- bienq, gij haengj gij yinx beixnuengx Myauzcuz caemh miz bienqvaq, hozdung ngoenzciet ciemhciemh demgya le yienj go foux caeuq bouxcoz doiq fwen gyau youx, caemh miz le guh gaicawx、lijyouz daengj hozdung, hawj ngoenzciet neiyungz engq fungfouq lai yiengh.

Ngoenz “ndwenseiq cobet”, gyoengq beixnuengx Myauzcuz cungj daenj dauq buhvaq gyaeundei ngoenzciet, caezgya comz daengz diegnywj diegdangz, caeqbaiq cojcoeng, caeqbaiq goengcoj yinghyungz, caeqbaiq saenzlingz; hozdung caeqbaiq guhsat le couh guh gak cungj gak yiengh byaujyenj, lumjbaenz ciengq go doiq fwen、diuq fouxgyong、benz laebakcax daengj, bouxyawj bouxdingq humx le caengz dem caengz caenx dwk ndaetfwdfwd, angqyangz nauhyied raixcaix.

Ngoenzciet “ndwenseiq cobet” Myauzcuz,  youq Huznanz Swngj Fungvangz Yen heuhguh cietdiuqva, youq Huznanz Suihningz Yen daengj dieg heuhguh cietlwgsau, youq Gveicouh Swngj Gveiyangz、Veisuij daengj dieg cix heuhguh “cietyanuj”, dwg caeqbaiq boux yinghyungz Myauzcuz ciuhgeq. Doengh gijneix cungj yienh’ok le gij daegdiemj saenqyiengj vwnzva cunghgyau Myauzcuz, youq ndaw aenhaij go foux gvangqlangh neix, gyoengqvunz ndaej roxyiuj lizsij、fungsug Myauzcuz lai cungj lai yiengh, ndaej youq ndaw ngoenzciet caeuq beixnuengx Myauzcuz doengzcaez angqyangz mbat gaeuq ndeu.