□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Baez diucaz neix, cujyau dwg ngeixyaeng roengzcuengq hengzguh hongreihnaz 16 diuz caeuq yungh swnghcanjdui guh danvih haedsuenq goekgaen le, gij gvanhaeh guh hong lajmbanj caeuq guh hong nazreih lij miz gijmaz vwndiz, wnggai caijyungh gijmaz banhfap daeuj caepmaenh ginghci cizdij, baenzlawz ndaej hawj guh hongnazreih ndaej hoizfuk caeuq mbefat ndaej engqgya vaiq di.

Gyoengq gihcwngz ganbu caeuq gyoengq seyenz cungj nyinhnaeuz, yaek guh ndaej hong cizdij, couh itdingh aeu miz aen swnghcanj cidu cwzyin yiemzgek ndeu, caencingq ndaej daejyienh ok baengh guh hong ndaej souhaeuj cungj yenzcwz neix cij baenz. Okhong vunz caenx gou gyaep gyaj haengjheiq, guh ndei guh yaez cungj doxdoengz, yienghneix mbouj ndaej caepmaenh gij ginghci cizdij, mbouj ndaej guh ndei hongnazreih.

Hoeng, baez yaeng baenzlawz gyagiengz gij cidu cwzyin, caezgya yigen cix mbouj doxdoengz lo. Mbangj vunz cawjcieng hong laux aeu cizcij vunzlai caez guh、 honglingz bau hawj gak ranz gag guh, mbangj vunz cawjcieng bau hong bau canj daengz cujguhhong, mbangj vunz dinghngeg guenjleix、 bingz hong geiq faen, caemh miz mbangj vunz cawjcieng baucanj daengz hoh.

Vih hawj caezgya haeujnaek doxyaeng doxlwnh, youq baez hoihnaenghdamz gihcwngz ganbu gyangde, Veiz Gozcingh heuh misuh Vuj Nwngzmingz doeg bien faenzcieng daeng youq gwnz 《Siusik Camgauj》, gvendaengz Anhveih Swngj guh “naz cwzyin” ndaej fungsou haenx. Ngamq doeg sat, cix miz vunz naeuz: “Cungj banhfap neix ndei, cungj banhfap neix couh dwg baucanj daengz hoh. Mbouj yungh duicangj hemq ok hong, seyenz swhgeij rox mo laep bae guh hong, mbouj ndaej demcanj cij dwg saehgvaiq ne!” Hix miz vunz nyinhnaeuz, cungj banhfap neix mbouj ndaej yungh, vunzguhhong ranz mbouj doengz ranz, miz bouxak hix miz bouxnyieg, danghnaeuz bungz deng cai hux, gwndaenj vunzlai itdingh yaek mbouj ndaej bingzyaenz, yingjyangj sevei onj- dingh. Hai hoih doxlwnh ndaej hoenghhwdhwd, daihgya mwngz coenz gou coenz, gangjmingz naemjfap bonjfaenh.

Ciuq youq Cizngoz Dadui modaej ndaej rox, daengx dadui 140 ranz vunz, miz 60 ranz vunz cung- eiq baucanj daengz hoh, miz 43 ranz vunz fanjdui, miz 37 ranz mbouj fandui hix mbouj haenh- doengz. 6 boux swnghcanjduicangj, dingz haenhdoengz, dingz fanjdui.

(caengz sat)