烟雨纷纷又清明

(ciep geiz gonq)

Seiziq mbouj rox vihmaz bae baiq daxbuz, daengz henz moh daxbuz seiz, daxboh cungj gig yiemzsuk, mbouj hawj dou youq henzgyawj cauznauh, naeuz aeu hawj daxbuz cingx di ietnaiq. Dou bouxboux gonggong gingqgingq diemj yieng baiq gvaq daxbuz le, couh swngz daxboh naengh youq henz moh ngaezngwd, caegcaeg ndot bae gizgyae guhcaemz. Caj dou guhcaemz dauqma, mbouj rox daxboh vihmaz naj saepsisi, lij lumj gyaenghfwnz nei naengh youq henz moh daxbuz, mbouj sing mbouj doengh, gou yawj mizdi geizgvaiq, couh siujsim cam daxboh naeuz, caiq diemj yieng baiq gvaq daxbuz le ndaej gip doxgaiq baema mboujcaengz. Daxboh dap mbouj doiq cam naeuz: “Daxbuz sou ciuhvunz daiq sinhoj lo.” Gij sing de gig geizgvaiq, lumj daj giz gig gyae cienz daeuj, hwk ndaej gou mbouj gamj guhsing.

Daxbuz dwg yahmaiq, daxboh gig iq couh dwg lwggyax, daxbuz mbouj gaijhaq, gag ciengx daxboh majhung, souh le haujlai hoj, gwn le haujlai vi. Daxboh ciengz gangj gij saehcingz de caeuq daxbuz haenx. Gou hung le cij rox, daxboh vihmaz bae baiq daxbuz ciengzciengz naengh dwk ngeix ndaej fatngaengq, daegbied yiemzsuk daegbied yousim. Daxboh daiq siengjniemh daxbuz lo, seiz dou bae guhcaemz, de gag naengh youq giz haenx siengjvaengvaeng, ciuhvunz daxbuz couh youq ndaw uk de ngeix gvaq baez ndeu lo. Gij haemzhoj daxbuz daiq lai lo, siengj daengz gijneix, aensim daxboh baenzlawz mbouj naekgywggywg youmoepmoep ne, gij sing’yaem daxboh baenzlawz mbouj bienq ndaej geizgvaiq——sapsaebsaeb vauvwtvwt, lumj daj gizgyae cienz daeuj ne?

Lij dwg gij lohndoi haenx, lij dwg gij gingjsaek haenx, hoeng, ndwenngoenz gvaqbae, seizgan mbouj doengz lo. Seizneix, gou cingq caeuq daegnuengx daiq lwg daiq lan daeuj baiq daxboh. Gyoengq lwgnyez bouxcoz hix lumj dou seiziq ityiengh, cici cetcet, youh maengx youh angq. Gyoengqde hix doengzyiengh mbouj rox gij simcingz dou. Seizneix, ndaw uk gou cij naemj daengz saehgonq, ndaw da cij yawjraen gij yienghsiengq daxboh, ndaw rwz cij dingqnyi gij vah daxboh. Siengj daengz daxboh soengq gou dah lwgmbwk neix doegsaw, souh le haujlai gungz, gwn le haujlai hoj; siengj daengz de muenx bingh mbouj hawj gou rox de baenz aizcwng, ganj seizgan haenqrengz bang daegnuengx guh ranzlaeuz, son daegnuengx guhvunz guh hong; siengj daengz de yaek goenqheiq seiz daengq dou aeu bang daegnuengx baenzranz baenz- vunz; siengj daengz de gvaqseiq le lij mbouj laep da……raemxda gou nyaenx mbouj ndaej nyoengx okdaeuj lo.

“Lwg aeu ciengx, boh mbouj youq.” Daxboh bae ndaej daiq caeux lo, mbouj caj daegnuengx baenzranz miz lwg, mbouj caj dou geiq ndaej gyaez de dauq. Seizneix, gou caeuq daxboh, yaem yiengz doxgek, miz vah gangj mbouj doeng, miz gyaez gyaez mbouj ndaej……baenzlawz sim mbouj heiq ne!

Gwnz ndoi fwnmoenq mbin- foenxfoenx, mbiengj ndoi haenx, gij fwjfwn nanupnup naekgywggywg, lumj boux ga naek ndeu naiqnueknuek menhmenh byaij coh mbiengj neix daeuj, daengz gizgyawj youh dauq yawj mbouj raen lo, lumj miz mbouj miz, lumj mbouj miz youh miz, couh lumj gij saehgaeuq, gyae’gyanggyang youh faenmingz hawj vunz roxnyinh daengz, naemj daengz, sawj vunz siengsim……Byoemgyaeuj caeuq buhvaq cungj bwdbadbad, ndawsim gou diuqfubfab mbouj dingz.

Fwnmoenq foenxfoenx youh cingmingz. Seizneix, gou cij caencingq rox daengz, seizciet cingmingz daeuj daengz, vihmaz “ndoi cingx feizyieng rongh, fwnmoenq vunz siliengz.”(sat)