风情独特的怒族鲜花节

□Cauz Yencinh ingj Sinhyungz hoiz

Moix bi liggaeuq ndwensam cibngux daengz cibcaet, youq seiz vainj hoengh hai neix, gyoengq beixnuengx Nucuz ranghdieg Yinz- nanz Swngj Gungsanh Duzlungzcuz Nucuz Swciyen cungj angqyangz gvaq aen ciet conzdungj hoenghhwd ndeu——cietvamoq.

Gij laizlig cietvamoq miz haujlai cungj gangjfap, hoeng cungj caeuq boux dahsien gyoengqde ndiepgyaez haenx mizgven, ndigah cietvamoq caemh heuhguh cietdahsien. Riuz naeuz gaxgonq Mbanjgizmuzdwz miz boux dahsau gyaeundei heuhguh Ahyungz ndeu, cauxok aen banhfap rod cagduk gvaq Dahnu’gyangh, fuengbienh vunzlai baedauq, lij youq gwnz dat Byagauhlizgung bag ok congh gamj ndeu yinx raemxmboq haeuj mbanj, hawj vunzlai miz raemx gwn naz miz raemx dwk ndaej gvaq saedceij ndei, gvaqlaeng goengdaeuz ndaw mbanj apbik hengzmanz yaek aeu de guh yahnoix, de buetdeuz ndoj haeuj conghgamj bae, doeklaeng deng goengdaeuz dwkfeiz coemh dai youq ndaw conghgamj, bienqbaenz aen siengqrin ndeu. Riuznaeuz ngoenz de dai haenx dwg liggaeuq ndwensam ngoenz cibngux. Gyoengq beixnuengx Nucuz vih geiqniemh boux dahsau coengmingz naengzganq maenh’ak neix, couh youq moix bi ngoenzneix caeqbaiq de.

Haetromh ngoenzciet, gyoengq beixnuengx Nucuz bouxboux cang- ndang moqsag gyaeundei, daiq doxgaiq dajcaeq、laex doenghduz、laeuj, fwngz gaem vainj daengj vamoq, byaij ok mbanj comz daengz baihnaj gamjdahsien, baij vamoq、haeuxceh、laeuj daengj doxgaiq dajcaeq hwnjbae, youz bouxlazmah roq gyong boq loxlez ngon ging, vunzlai caez baiqyed yienh laex, muengh dahsien、saenzbya baujyouh vunzlai ndang cangq vuenyungz、gohaeux fungsou、doenghduz maj vaiq. Riengzlaeng baij geij dah sau haeuj conghgamj bae ciep aeu “raemxsien”, riuznaeuz gij rin- raemxndik Ahyungz vaqbaenz haenx lae ok gij raemx hau lumj raemxcij nei couhdwg “raemxsien”, dawz okdaeuj faen hawj daihgya caez gwn; yienzhaeuh gak ranz roxnaeuz baengzyoux caencik gag humx naengh dwk gwn ngaiz, daihgya ciengq go doiq fwen diuq foux, angqyangz nauhyied raixcaix.

Seizneix, cietvamoq gaenq baenz ngoenzciet fapdingh Nucuz, hozdung ngoenzciet hix daj cijdan caeqbaiq fazcanj daengz miz gofoux biujyienj、doxgaiq gaicawx daengj lai cungj lai yiengh. Riengzdwk ngoenzciet yied banh yied hoengh, gyoengq beixnuengx Bouxgun、Lizsuzcuz、Cangcuz、Duzlungzcuz dangdieg caemh angqyangz camgya haeujbae, daihgya itheij doxdax nyingz naq、gwih max buetvaiq、ciengq go diuq foux, nauhyied raixcaix, moix bi lij miz haujlai vunz daj dieg wnq caiqlij miz baengzyoux guekrog daeuj ngonzyawj ne, gij gingjyawj ndeiyawj、fungsug fungcingz daegbied gag miz haenx, hawj gyoengq hekyouz roxnyinh mizyinx dangqmaz, caemhcaiq deihdeih haenhdanq.