□  Cangh Gaij

□ 张 凯

Seiqcib bi gaxgonq, Cwnh Youjfuz caeuq Sung Siujmeij, ginggvaq mehmoiz guhmoiz, song mbiengj bohmeh ciuq gij fungsug dangdieg, song boux de baiqdangz baenzgya lo. Sung Siujmeij haq haeuj ranz ngoenz daihsam, song boux de caez ma ranzmeh, mwh gwnz loh dauqma, song boux doxndaq ciengz he, gvaqlaeng geij cib bi, song boux cungj dwg ngoenz song ngoenz couh doxndaq baez ndeu, couh yienghneix doxndaq seiqcib lai bi lo.

Daj baez daih’it doxndaq hainduj, Cwnh Youj- fuz cungj sing hung rongx dwk ndaq vunz, lumj fatbag nei, miz seiz lij siengj moeb vunz dem. Sung Siujmeij ne? Youzcaih de fatheiq, cungj doiq ranznden daeuj gienq haenx riuriu, naeuz: “De cungj vunz neix, beizheiq yaez, hawj de okok heiq, couh mbouj miz saeh lo.”

Youq ndaw da vunzlai daeuj yawj, gyoengqde gig mbouj doxboiq. Cwnh Youjfuz miz di laenggungq, cawzle din fwngz riengj, rox roengz dah gaeb bya gaeb gungq, rox guh nazreih le, lumjbaenz ra mbouj daengz gijmaz ndeicawq lo. Hoeng Sung Siujmeij ne, mehmbwn aiq dwg gyaez de lai, aeu giz ndei mehmbwk haenx cungj hawj de lo, de seizbienh riu mbat he, mbouj rox aeu geijlai hoenz gyoengq bouxsai bae ha.

Song lwgmbauq song lwgmbwk songde, cungj gig cengheiq, guh ndaej gwn. Daeglwg hung youq Baekging dwg fangzdicanj gaihfazsangh, dwg lauxbanj hung, daeglwg iq caeuq dahlwg hung youq Sanghaij, boux ndeu dang guen boux ndeu dang lauxbanj. Cib bi gonq, dahlwg iq bae Cuhhaij fazcanj, seizneix miz mauyi gunghswh swhgeij, seng’eiq gig hoengh.

Bi’gvaq seizdoeng, dahlwg iq ma ranz, doiq daxmeh naeuz: “Meh, gou guhhong nyaengq lai, mbouj miz seizgan daiq Lozloz. Vuenh geij boux baujmuj lo, cungj mbouj habhoz, siengj ciep mwngz bae daiq Lozloz, mwngz nyienh bae lwi?”

“Yawj mwngz gangj gijmaz ha, gou cingq siengj vaihseng gou, ngoenzcog gou couh caeuq mwngz bae Cuhhaij daiq Lozloz.”

Couh yienghneix, dahlwg iq daj henz ndang daxboh ciep daxmeh bae Cuhhaij lo.

Mbouj geij nanz, daeglwg hung hix ma ranz, doiq daxboh naeuz: “Boh, mwngz miz bi lai mbouj bae Baekging lo, Yenzyenz siengj mwngz lai lo. Mwngz yawj gou ba, daengx ngoenz cungj nyaengq, aen laeuzbezsu rogsingz gou mbouj miz vunz guenj, gig mbouj cuengqsim. Gawqyienz daxmeh bae ranz dahnuengx lo, mwngz bouxdog youq ranz hix godan lai, mboujmiz mwngz couh bae Baekging, bohlwg raeuz hix ndaej dox ciuqgoq.

Daxboh siengjsiengj hix deng, lajbyonghngoenz couh caeuq daeglwg bae Baekging lo.

“Goenglaux ha, mwngz mbouj rox lo, gou gizlawz dwg daeuj daiq vaihseng ha!” Mehyah youq dienhvah mbiengj haenx naeuz，“Mwngz yawjyawj, gou cungj daeuj lo, gyoengqde lij cingj baujmuj daiq vaihseng, gou yawj ha dwg cienz lai mbouj miz dieg yungh lo. Mwngz lij gaej gangj, song gvanbaz de caen hauqswnh, dajcang gou lumj dahsau cibbet nei, ngoenzsinghgiz cungj daiq gou bae Cuhhaij youz, baenz geq lo, lij ndaej raen seiqmienh, song boux raeuz mbouj beg ndiep dahlwg neix bw.”

“Aeya, mehlaux ha, mwngz gaej gangj, daeglwg caeuq lwgbawx gig ndiep gou.” Goenglaux youq dienhvah mbiengjneix riuhwhw naeuz,“Hwhw, songde hawj gou gwn ndei daenj ndei mbouj suenq, lij sai cienz heuh gou bae hag dwk veizgiz、daz ngeihyienz、ciengq go, ngoenz singhgiz lij buenx gou bae ndaw gehhongh Baekging youz, naeuz gou bouxlaux gag youq ranz gadog mbwq lai, mwngz naeuz gou gvaq baenz ciuhvunz lo, lij lau gijmaz gadog, caen dwg lo.”

Dingq goenglaux lumj lwgnyez nei gangj Niujcauz gangj Denh’anhmwnz, gangj aen Gugungh gangj aen dienhgimlonz, mehyah youq dienhvah mbiengjhaenx riuhaha, naeuz de caen dwg boux vunzdoj. Dingq daengz mehyah sing riu coz baenz cib bi, de hix riuhwhw, riuhwhw dingq mehyah gangj gij saeh baihnamz sawj vunz najmong haenx, dingq de gangj Meizhih aen baizfangh haenh mehmbwk mbouj luenh guh mbouj gaijhaq haenx beg laeb lo, lij dingq de gangj aen gamj rwix he, bouxsai daujyouz nyengh gangj baenz aenbak byaleix, neix mbouj dwg luenh gangj ha? Vunz baihnamz caenh rox bien.

Yaepda couh gvaqbae sam ndwen lo. Goenglaux doiq mehyah naeuz: “Geij ngoenz neix gig huj, gaiqga byaij mbouj fuengbienh, ninz mbouj ndaek naengh mbouj onj.”

Daeglwg raen daxboh byom lo, gig simgip, cuengq roengz seng’eiq mbouj guh, daiq daxboh bae Baekging geij aen yihyen hung genjcaz, gwn le haujlai yw, cungj mbouj raen ndei.

Mehyah doiq goenglaux naeuz, “Gou baez ninz couh loq, gwn hix mbouj van, geiq gyaeuj lumz rieng, lumj hoenz doek nei.”

Dahlwg lwggwiz raen daxmeh mbouj miz cingsaenz, byaij loh mbouj miz rengz, bouxvunz unqnemnem, couh muenz daeggo dahcej, daiq daxmeh bae yihyen Cuhhaij Gvangjcouh genjcaz, hix caz mbouj ok gijmaz bingh.

Goenglaux dingq daengz mehyah gangj vah unqnemnem, rox de bingh lo, youq ndaw dienhvah hozndat ndaq naeuz: “Mwngz dwg baenzlawz guh ha, ha! Namhhenj cungj haem daengz aenhoz lo, lij hawj vunz causim, lienz swhgeij cungj ciuqgoq mbouj ndei, baenzlawz daiq ndaej vaihseng? Danghnaeuz dwg yienghneix, mwngz dai youq Cuhhaij, gou hix mbouj bae soengq mwngz!”

Dahlwg raen daxmeh gaem aen dienhvah mbouj gangj vah, aen’gyaeuj ngaem dwk, rox daxboh youh ndaq daxmeh lo. Dahlwg ciengj gvaq dienhvah rongx naeuz:“Boh, daxmeh baenzbingh, mwngz mbouj nai de couh suenq lo, lij ndaq de, miz mwngz yienghneix ha?”

Daxmeh yawj dahlwg fatheiq, couh doiq dahlwg naeuz:“Daxboh mwngz couh dwg cungj beizheiq neix, de simgip hane.”

Ngoenz he, dahlwg cam:“Meh, mwngz gangj, mwngz siengj guh gijmaz lwi?”

Daxmeh siengj cungj mbouj siengj naeuz:“Gou couh dwg siengj daxboh mwngz!”

Daeglwg rox daxboh daengx hwnz cungj ninz mbouj ndaek, hix mbouj miz maz banhfap, couh cam:“Boh, mwngz haemhhaemh cungj ninz mbouj ndaek, dauqdaej siengj gijmaz ha?”

Daxboh gveng mbaw bauqcawj ndaw fwngz ndaq naeuz:“Gou couh dwg siengj daxmeh mwngz, mbouj ndaej ha?”

Daeglwg deng daxboh ndaq dwk ndawsim gig doeksaet, de rox lo, daxboh caeuq daxmeh lau lwgmbauq lwgsau riu songde, cij nyaenx youq doxsiengj doxgvaqniemh, mbouj gamj gangj gijmaz youq Baekging caeuq Cuhhaij doxliz geij cien leix haenx youq.

Daeggo caeuq dahnuengx siengliengz, soengq daxboh caeuq daxmeh ma ranzcoj lo.

Ngamq ma daengz ranz, Cwnh Youjfuz couh duet haiz loh din bae reih guhhong lo, banhaemh ma daengz ranz, yawj mehyah youq ndaw ranz nyaengq neix nyaengq haenx, baez haeuj ranz, couh sing hung ndaq naeuz:“Mwngz mingh caen cienh, cungj mbouj raen mwngz vangq saek seiz!”Mehyah dingq le, mbouj hozndat saek di, riuhwhw naeuz: “Couh dwg mwngz mingh bengz, mwngz hix mbouj vangq ha, mwngz mbouj dwg lij bae reih guhhong ha? Lij naeuz gou ne……”

四十年前，甄有福和宋小美经媒人撮合，双方父母按当地风俗，他们拜堂成了亲。宋小美进门的第三天，他们一起回娘家，回来的路上，小两口就大吵一架，之后的几十年，三天一小吵，五天一大吵，一吵就是四十多年。

从第一次吵架开始，甄有福几乎都是声震天地，歇斯底里，有时还想动粗，拳头紧握。而她呢？任凭他发火，总是对劝架的邻居笑笑，说：“他爸这人，脾气臭，让他发发火，就没事了。”

在十里八乡的人看来，他们很不般配。有点驼背的甄有福，除了手脚勤快，会下河逮鱼摸虾侍弄庄稼外，似乎再也找不到什么长处。而宋小美，上帝钟情她，亚当夏娃似乎把女人的优点全都给了她，就是随意地一笑，也不知有多少男人倾心。

他们的两儿两女，都很争气，有出息。大儿子在北京是房地产开发商，是大老板，小儿子和大女儿在上海一个当官一个做老板。十年前，小女儿去珠海发展，现在有自己的贸易公司，生意红火。

去年冬天，小女儿回家，对妈说：“妈，我忙里忙外，应酬多，没时间带乐乐。换了几个保姆，都不称心，想接你过去照看乐乐，妈你乐意吗？”

“好闺女，看你都说啥呢，我正想外孙呢，明天就跟你去珠海带乐乐喽。”

就这样，小女儿从她爸爸身边把妈妈接到珠海。

不久，大儿子也回到家，对爸说：“爸，你有一年多没到北京了，媛媛可想爷爷了。你看我吧，整天瞎忙，郊区的别墅没人照应，很不放心。既然妈去了妹妹家，爸，你一人在家也孤单，不如去北京，我们爷俩也好有个照应。”

老爷子想想也是，下午就和儿子一起去了北京。

“老头子，你不知道，我哪是来带外孙啊！”老伴在电话那头说，“你看看，我都来了，他们还请保姆带外孙，我看，是有钱烧得。还别说，小两口可真孝顺，给我打扮得像十八的，礼拜天老带着我满珠海转悠，老了老了，还真开了眼界，俺老两口没有白疼这丫头。”

“哎呀，老婆子，你还说呢，俺儿子媳妇呐，就别提有多疼俺喽。”老爷子在电话这头笑呵呵地说，“嘿嘿，他们叫我吃好的穿好的不算，还花钱叫我去学下围棋、学拉二胡、唱京剧，星期天还陪我去北京胡同里瞎转悠，说是我一个老头子在家孤独，你说，这都一辈子了，还怕什么孤独，真是的。”

听他像孩子似的说鸟巢说天安门，说故宫说金銮殿，她在电话那头哈哈大笑，说他真老土。听她年轻十岁的笑声，他嘿嘿、嘿嘿地听她说南方许多羞死人的事，听她说梅溪的贞节牌坊白设了，还听她说一个破山洞，举旗子的小伙子非说成是鲤鱼嘴，那不是乱来吗？南方人真会瞎编。

转眼三个月过去了。他对老伴说：“这些天老上火，走路腿脚不好使，睡不好觉，坐立不安。”

大儿子看到爸瘦了一圈，心里着急，放下生意不做，带着爸到京城几个大医院检查，药吃了不少，就是不见好。

她也对老伴说：“我一睡觉就做梦，吃饭也不香，老是丢三落四，掉魂的一样。”

女儿女婿看到妈无精打采，走路都没劲，病怏怏的样子，瞒着哥哥和姐姐，带妈到珠海去广州的医院检查，也没查到什么病来。

他听到老伴说话软绵绵地，知道她病了，抱着电话冲她发火：“你是怎么搞的，啊！黄土都埋到脖子了，还不让人省心，连自己都照顾不好，能带好外孙吗？要是还那样，你死在珠海我也不给你收尸！”

女儿看到妈妈对这话筒不说话，耷拉着脸，知道爸爸又在吼妈妈了。夺过电话冲爸爸道：“老爸，妈妈生病，你不安慰倒罢了，还吼她，有你这样的吗？”

妈看女儿发火了，就喃喃地对女儿说：“闺女，你爸就那脾气，他心里急呢。”

一天，女儿问：“妈你能告诉我，你想做什么吗？”

妈想都没有想说：“我就想你爸！”

儿子知道爸爸夜夜不睡觉，拿他没有办法，就问：“爸，你说你，天天不睡觉，到底想什么呀？”

爸一甩手里的报纸骂道：“臭小子，老子我想你妈！还不行吗？”

儿子被爸爸骂得心里“咯噔”一下，终于明白爸和妈怕儿女笑话，才忍受着彼此的思念和牵挂，无声无息地呆在相隔几千里北京和珠海。

哥哥和妹妹商量，把爸爸和妈妈送回老家。

刚回到老家，甄有福就打赤脚下地干活，晚上回到家，看到老伴屋里屋外的那个忙啊，一进门，就扯着粗大的嗓门发火：“就你命贱，一点都闲不住！”老伴听了，没觉得一点受屈，笑呵呵地说：“就你命金贵，就你能闲得住，还不是跑到地里干活？还说我呢……”