展示独特民族文化的白族“三月街”

□Lij Dabwz ingj Sinhyungz hoiz

“Gai ndwensam” dwg ngoenzciet conzdungj beixnuengx Bwzcuz, caemh dwg aen hawhoengh doxgaiq ndawbiengz doxvuenh gaicawx caeuq vwnzyiz hozdung conzdungj Bwzcuz, moix bi liggaeuq ndwensam cibngux - ngeihcib it youq baihsae singzgeq Dalij hoengh banh, ciuq ndaw sawgeq geiq naeuz gaenq miz it cien lai bi lizsij. Ngoenz haenx, gwnzgai vunz cien vunz fanh, bouxseng’eiq caenx dwk daetfwdfwd, gak cungj gak yiengh doxgaiq baij dwk deihdaendaen. Cawz miz doxgaiq doxvuenh gaicawx le, lij miz yienj go foux minzcuz、dijyuz doxdax daengj hozdung dem, nauhyied hoenghhwd.

“Gai ndwensam” nyuenz dwg hawmiuh fuzgyau, cujyau hozdung dwg gangj ging baiq baed. Aenvih Dalij daj ciuhgeq gvaqdaeuj couhdwg gizdieg cungsim doxgaiq doxvuenh gaicawx、comzsanq ndeu, riengzdwk dieg Bwzcuz ginghci fazcanj, “gai ndwensam” daj baiq baed hozdung bienqbaenz le aen hawhoengh doxgaiq doxvuenh gaicawx caeuq vunzlai vwnzyiz hozdung. Ngoenz haenx, cawz miz vunz dangdieg ganjhaw le, bouxseng’eiq gyawjgyae cungj daj seiq fueng bet baih daeuj guh gaicawx, ywdoj、gijgwn、gyasei、doenghduz daengj yienghyiengh miz caez. Baihneix guh gaicawx nyaengqnyi, baihhaenx go foux minzcuz daegsaek daegbied caeuq gwihmax doxdax、bi buengqyed、dwk gyangq、nyingz naq daengj minzcuz dijyuz yindung hanghmoeg caemh nauh dwk hoenghhwd. Daj hawciengz daengz daizheiq, daj gakdoh caeuq mbiengjhenz mbouj doengz de fanjyingj le singzgeq Dalij gak minzcuz sevei lizsij vwnzva caeuq cunghgyau fungsug nem gij dwzcwngh ranghdieg swnghcanj swnghhoz de, gyoebbaenz le gij gingjyawj vwnzva lai yiengh beixnuengx minzcuz ranghdieg neix.