热闹非凡的和里村“三王宫”庙会

□Cangh Aibingz ingj Sinhyungz hoiz

Moix bi liggaeuq ndwenngeih co’ngux, gyoengq beixnuengx Dungcuz Sanhgyangh Dungcuz Swciyen Liengzgouj Yangh Hozlij Cunh cungj banh ciengz hawmiuh “Dienhsamvuengz” hoenghhwd ndeu, goenglaux ndaw mbanj gwnz ndang daenj dauq buhciuhgeq ndeu, cang baenz vunzciuhgeq daiq gyoengq vunzmbanj caeqbaiq saenzmiuh. Ngoenz haenx, ndaw mbanj lij banh yienj Heiqdung daengj gak cungj gak yiengh hozdung, ciengzmienh hoenghhwd nauhyied.

“Dienhsamvuengz” Hozlij Cunh dwg aen miuh gyoengq beixnuengx Dungcuz caeqbaiq sam daeg lwg guekvuengz Guekyelangz Cuz Dohdungz ndeu, youq Ciuh- mingz bi Gyahcing hwnjguh, ciemq dieg 1200 bingzfanghmij, gij baijbouh de lumj gij ranz ndaw gunghdingz Bouxgun ciuhgonq, hoeng daizheiq、ranzvang daengj youh dwg yiengh ranzcanx Dungcuz, dwg aenranz miz daegsaek yisuz dajcaep Gun Dung doxhab gig denjhingz ndeu. Aen Giuzyinzhoz daep henz de haenx, youq Ciuhcingh Gvanghsi bi ngeihseiq caepguh, dwg aengiuz giuzndojfwn yienghgungj miz daegsaek Dungcuz ndeu. Song aen neix 2009 nienz ndaej lied haeuj le Gvangjsih cungdenj vwnzvuz baujhu danhvei. Dungcuz rangh dieg neix, riuz cungj vwnzva saenqyiengj ciuhnduj gyo’mbaiq bauqaen、gouzmuengh rumz swnh fwn yinz、mbaenjmuengh guekgya biengzbingz lwgminz angqyangz ndeu, neix couhdwg “vwnzva Yelangz”. Bingzseiz gyoengq bek- singq rangh dieg neix cungj haengj bae “Dienhsamvuengz” siuyieng, daegbied dwg ngoenz liggaeuq ndwenngeih co’ngux, giz- neix hoenzyieng engq oenqgoed caeqbaiq engq nauhyied.

Ngoenz hawmiuh, baenz cien baenz fanh boux beixnuengx Dungcuz ranghdieg Hozlij Cunh caez comz youq gyanghongh “Dienhsamvuengz”, hoenghhwd banh aen hozdung daenj buhciuhgeq caeqbaiq saenzmiuh, neiyungz miz lai cungj lai yiengh, baugvat daenj buhciuhgeq youzbyaij、goenglaux ndaw mbanj daiq guh yizsi caeqbaiq、diuq fouxdohyeh、luzswngh caijdangz、yienj Heiqdung、gwn ngaizbakranz daengj fungsug Dungcuz hozdung, hawj gyoengq bouxhek daj ndaw guek rog guek ganj daeuj yawjngonz haenx caenhcingz angqyangz dwk gvaq mbat ciet fungcingz Dungcuz naekgywggywg ndeu.