□Fangh Swlunz/方仕伦

Youq lajmbanj Vanzgyangh Yen, moix bi fid bwnh rienghvaiz liux le aeu gvej haz ma demh riengh, gyoengq bouxcoz mbwk sai gak mbanj couh guhdoih bae gwnzbo (Bo’yiemh、 Bo- nyouh) gvej haz, gyoengqde doq gvej haz doq ciengq fwen doxdaeuq.

Sai: Haetromh gwnz mbwn rongh dingjgyang,

Dawz liemz coq ndang gvej hazriengh;

Byaij roen ndaej nuengx daengh beij ciengq,

Cingj mwngz yax nyiengh gou saek coenz.

Hanzhaz fagliemz hwnj gyangbaq,

Naet siengj vuenh mbaq miz nuengx bang;

Haetromh gwnz mbwn rongh dingjgyang,

Dawz liemz coq ndang gvej hazriengh.

Roegciu guhdoih cix maengx ciuz,

Doxdaemx gwnzgiuz cix doxciengh;

Byaij roen ndaej nuengx daengh beij ciengq,

Cingj mwngz yax nyiengh gou saek coenz.

Mbwk: Gwed diuz hanzhaz bae gvej haz,

Raeuz yienzfaenh na ndaej guhdoih;

Roegenq fukndei cix baenz doiq,

Caemh go gungh roix gou ndeimaez.

Ngoenzneix gwnzmbwn saedsaeh gvengq,

Bae aeu hazriengh sangj dangqmaz;

Gwed diuz hanzhaz bae gvej haz,

Raeuz yienzfaenh na ndaej guhdoih.

Liemz raeh gaet haz cix ndaej riuz,

Cax raeh raemj liu sing cix byoiq;

Roegenq fukndei cix baenz doiq,

Caemh go gungh roix gou ndeimaez.

(caengz sat)