香格里拉——“心中的日月”

□Lij Gwz ingj Sinhyungz hoiz

Yanghgwzlijlah dieg youq gwnz ndoi gatvang baihdoeng- namz Cingh Cang Gauhyenz, dwg gizdieg geij diuz dah hung Yacouh lae gvaqbae haenx. Gij dah neix mbouj dingzduenh dwk gaekdeu baenz cienfanh bi, caux ok baenz benq baenz doengh gingjyawj swyenz hungloet geizheih gwnz seiqgyaiq gag miz. “Aen giuz ndeu、aen daiz ndeu、song aen huz、goengq bya ndeu” baenz le gingj gyaeundei gyoengqvunz doxriengz bae cimhra haenx, neix couhdwg Giuzsengcingz、Daizraemxhau、Nazbwzhaij、Bizdazhaij caeuq Byanae Hahbah, aeu gij gingj gyaeundei lumj diegsien lumj youq ndaw loqfangzhwnz de baenz gizdieg lijyouz daengx seiqgyaiq mizmingz ndeu.

Yanghgwzlijlah aen sawloih neix dwg daj bonj sawcuenh 《Diuz Sienqdeihbingz Siusaet》 vunz Yinghgoz Canhmujswh·Hih- wjdun sij haenx aeu daeuj, ndaw saw sij le gizdieg ciengxlwenx bingzlingz dinghcaem ndeu, dwg gizdieg rog biengz gyaeundei miz byanae lueglaeg、gij miuh saenzmaed、aen huz caemdingh、doenghnywj gyaeundei nem vaizyiengz baenz bang baenz gyoengq ndeu, vah Cangyij eiqsei dwg “aen daengngoenz rongh- ndwen ndawsim”. Vunzraeuz cimh bae ra dauq baenz buenq aen sigij, raen Yinznanz Swngj Dizging Cangcuz Swcicouh gingjsaek caeuq ndaw saw sij haenx doxlumj liux, baenzneix, gizneix couh baenz le “Yanghgwzlijlah” ndawsim gyoengqvunz. Doeklaeng, aen couh neix Cunghden Yen couh gaij heuhguh Yanghgwzlijlah Yen.

Yanghgwzlijlah dieg youq ranghdieg “daih samgak” Yinznanz、Swconh、Sihcang sam swngjgih neix, gizneix byanae hophumx, benqrum caeuq benqbingz miz hung miz iq dwk sanq youq gwnz gauhyenz, diegnamh bizbwd, vaizmax baenz bang. Youq benq dieg caemdingh neix, miz raemxhuz dinghcup、aenmiuh swnzswng、gyoengqvunz simndei simsoh. Goengqbya saenzgeiz gyaeundei, vwnzva minzcuz cwkrom gyae’nanz, ung ok cungj singgwz simsoh、aekgvangq gak minzcuz dieg neix, caemh sawj dieg neix minzcuz fungcingz fungsug lai cungj lai yiengh gak miz daegsaek. Moix bi ndwenngux co’ngux aenhoih max buet doxdax hoenghhwd nauhyied; “ndwenngeih cobet” Nazsihcuz、“cietbogfeiz” Yizcuz daengj ngoenzciet cungj daegsaek naekgywg gag miz daegdiemj mizyinx raixcaix.