Gangj hwnjdaeuj, gij vaenlaex gyoengq beixnuengx Dungcuz Sanh- gyangh Dungcuz Swciyen geizheih daegbied youh gig hoenghhwd, ngoenzlaeuj itbuen youq ndwencieng geizgan banh, ranghdieg Cwngzyangz bet aen mbanj haenx daengz seizneix lij louz miz gij fungsug sibgvenq haemhndaep ciep bawxmoq bae ranzgvan, ndwencieng cosam youh caez soengq bawxmoq ma ranzmeh haenx. Daegbied dwg yiengh fungsug ndwencieng cosam soengq bawxmoq hoizmonz neix, ndaej gangj dwg ndaw vaenlaex Dungcuz aen yizsi geizheih daegbied hoenghhwd ndeu. Ngoenz soengq bawxmoq hoizmonz haenx, ranz gwizmoq bwh ndei mounding、byasoemj、bitsoemj、nohsoemj、ceiz caeuq laeujhaeux daengj huqlaex, bawxmoq cix cangndang gyaeugetget dwk deq aen seizndei baez daengz couh angq- vauvau ok dou. Baenzneix, diuz loh daj ranz gwizmoq daengz ranzmeh bawxmoq, couh ndaet lumj haw nauh lumj yienjheiq nei nauhyied gyukgyad hwnjdaeuj, bauqrengh yiengj mbouj dingz, sing riu gyukgyadgyad, gyoengqvunz soengq- cin caeuq gyoengq vunzmbanj humx yawj haenx daenz dwk diuz roen neuznedned.

“Hoizmonz” couhdwg soengq bawxmoq ma ranzmeh, soengq bawxmoq ma ranzmeh seiz gwizmoq mbouj ndaej riengz bae, dwg youz gyoengq beixnuengx cejnuengx caeuq caencik baengzyoux ranz gwizmoq ram(rap) huqlaex, gyoeb- baenz aendoih soengqcin foedfoed nanghnangh ndeu, aendoih soengq- cin yied raez, gangjmingz gyanieb ranz gwizmoq yied hwngvuengh. Bouxbuenx dwg gyoengq dahsau ndaw mbanj gwizmoq, youq aendoih soengqcin raezrangrang ndawde, bawxmoq byaij youq ceiq doek- laeng, ndaw fwngz gaem vengq baengz caeuq di hazranz ndeu, hawj vunz baez yawj couh nyinh ok. Seiz soengqcin, vihliux yienjbaij gij gyanieb ranz gwizmoq, aendoih soengqcin cungj daegdaengq genj roen gyae heux byaij, con gvaq doengh dieg miz vunz lai haenx. Gwnz roen moix gvaq aen mbanj ndeu, cungj cit bauhrengh yienjbaij. Aendoih soengqcin daengz bak- mbanj ranzmeh bawxmoq le, deng vunzmbanj ranzmeh bawxmoq aeu faexsaux lanz dwk, doiq fwen gvaqgvan caiq gwn laeuj lanzroen le cij ndaej haeuj mbanj. Soengq bawxmoq daengz bakdou ranzmeh le, gyoengq dahsau guhbuenx haenx mbouj ndaej haeuj ranz bawxmoq bae. Vunz ranzmeh cix sikhaek ndenq vanj youzcaz dwk dangz ndeu hawj moix boux vunzhek, heuhguh “cazangq”. Haeuj ranzmeh bawx- moq le, song mbiengj caez doxdongx doxhoh, caiq doxcaemh naengh gwn ngaiz, ciengzmienh nauhyied dangqmaz.

Doengxhaemh, gyoengq boux- coz caengz gietvaen ndaw aendoih soengqcin caeuq gyoengq bouxcoz caengz gietvaen ndaw mbanj ranzmeh bawxmoq cungj caez comz youq dieg ndeu gangjgoj, ra boux youx bonjfaenh maij haenx, neix couhdwg aen fungsug “naenghhwnz” beixnuengx Dungcuz ciengzciengz gangj daengz haenx lo.