Ciuq gij iugouz vunzlai, Swcigih Dangiveij youq bi 1961 ndwen 5 ngoenz 8 hauh youq《Gij Gvidingh Boujhaeuj （Bonjgauj） Gvendaengz Hengzguh 》ndawde vix ok：“Banh roxnaeuz mbouj banh ranzngaiz, camgya roxnaeuz mbouj camgya ranzngaiz, wnggai cungj youz seyenz gag gietdingh, seyenz nyienh banh couh banh, mbouj nyienh banh couh mbouj banh, nyienh camgya couh camgya, mbouj nyienh camgya couh mbouj camgya. Mbouj ndaej dawz banh mbouj banh ranzngaiz、camgya mbouj camgya ranzngaiz daeuj dangguh byauhcunj bingz seyenz guh hong ndaej ndei roxnaeuz yak caeuq cinbu roxnaeuz doeklaeng. Camgya mbouj camgya ranzngaiz, mboujdanh seyenz aeu gagnyienh, dangjdonzyenz ganbu hix aeu gagnyienh.”

Mbatneix Veiz Gozcingh caiq daengz Dwngzsiengz, ranzngaiz dox- gungh gaenq deng siu lo. Vunzlai gig rimhoz. De cujyau diuhcaz ngeixyaeng baenzlawz diuzcingj nungzyez swngh- canj dijci, hawj vunzlai engq haengjheiq guh hongnaz. Swcigih Nungzyezdingh dinghcangj Se Dungh- laiz caeuq de caez bae, de dwg boux nungzyez conhgyah ndeu.

“Lauxse, geij bi neix daeuj raeuz guh saehbamz mbouj noix bw, youq cawqleix aen vwndiz sojyoujci laj- mbanj neix simmbaeu di lo, bienqdoengh lai, bi 1958 banh gunghse seiz dwg gunghse sojmiz, bi 1960 youh doiq baenz dadui sojmiz, mwngz yawj hengzguh dadui sojmiz dwg mbouj dwg hab lajmbanj swnghcanjliz mbefat ne?”

“Mbouj itdingh dwg hauhneix, gou yawj vanzlij aeu caiq doiq dem cij baenz!” Se Dunghlaiz gangj vah gig soh, sim baenzlawz siengj bak couh baenzlawz gangj, youq doiqnaj Veiz Gozcingh engq dwg vah gijmaz cungj gangj.

Veiz Gozcingh hix roxnyinh daengz: Dangqnaj dadui dawz laudungliz、 nazreih、 doenghduz、 hongdawz dingh hawj swnghcanjdui yungh, doiq swnghcanjdui hengzguh baucanj baugoeng、 bau ngaenzgoek, ok haeux mauhgvaq yinvu couh ciengjli aen banhfap “sam bau it ciengj” neix, lumj mbouj ndaej daj goekgaen gaijgez swnghcanjdui ndawde bingzyaenz cujyi haenx.

(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz