(ciep geiz gonq)

Gou boux daih’it byaij haeuj ndaw caujyenz bae yawjngonz vagwz- sangh. Vagwzsangh baenz nyup baenz nyup hai youq geh nywjheu, yienghceij dujva lumj makgak nei, mbouj suenq hung, hawj gou roxnyinh geizheih dwg saek vagwzsangh, saekde miz lai yiengh: Miz saekhenj、saekhau、saekmaeq, geij yiengh saek dox- baengh, sawj daengx aen caujyenz engq gyaeundei maezvunz. Go vagwzsangh ngamq miz geij conq sang, caeuq nywjheu seiqlengq doxbingz. Danghnaeuz mbouj miz gij va neix, mwngz itdingh mbouj haeujsim daengz de ne!

Gyawj yawj vagwzsangh, baenz duj baenz duj va lumj najriu lwgnyaeq nei, dwggyaez dangqmaz. Cozmaj naeuz, dieg caujyenz baihbaek va noix yienj ndaej gig danhdiu, hoeng Yihlah Caujyenz baengh miz gij vagwzsangh neix daeuj cang, yienjndaej engqgya miz senggei!

Gou maeuq roengzdaeuj fwngz lumhlex duj Vagwzsangh he, sijsaeq uet raemxraiz baihgwnz dujde bae. Duj vagwzsangh miz bet limq va, ganj de youh leg youh iq, lumj goengq yieng nei. Cozmaj raen gou yawj ndaej haeujyinx, byaij gvaq henz daeuj doiq gou naeuz, “gwzsangh” song cih saw neix dwg ciuq yaem Vahcang sij gvaqdaeuj, gij eiqsei de dwg “vuenyungz”, “vagwzsangh” hoiz baenz Sawgun couhdwg “vavuenyungz”. Cozmaj lij naeuz, yienznaeuz go vagwzsangh yawj hwnjdaeuj gig lengjgengz, hoeng gij sengminghlig de gig ak: Fwn yied na gij mbaw de bienq ndaej yied heu; rumz yied hung gij ganj de yied maenh; ndit yied haenq gij va de yied angj. Seizdoeng, dieg caujyenz neix cungj ngaiz siet goemq dwk, hoeng bilaeng haicin le, go vagwzsangh ciuqyiengh dok rag fat mbaw yienghgaeuq.

Dingq Cozmaj baenzneix gangj, youh yawjraen ndangdaenj de siuq miz gij va neix, gou sikhaek roxdaengz, youq ndaw lwgda gyoengq beixnuengx Cangcuz, vagwzsangh mboujdanh daibyauj gyaeundei caeuq vuenyungz, lij daibyauj yiengh cingsaenz doxgiet mbouj lau haemzhoj he. Vagwzsangh ciengxlwenx angjhai youq ndawsim gyoengqde!

Daengngoenz hwnj sang lo, raemxmok hix ciemhciemh siu gvaq gizwnq bae, fwj daemq lumj diuz hahdaz nei venj youq gwnz caujyenz. Dwg dahraix, youq laj ndit, vagwzsangh yienj ndaej engq ronghsag, lumjnaeuz de rox miz hekgyae daeuj caemz nei daegdaengq angjhai dwk. Haxbaenh youq ndaw mok yawj de dwg baenz diemj baenz diemj he, seizneix yawj de dwg cix baenz benq baenz benq he. Va caeuq nywjheu doxgyoeb lumjdwg fan damj hung he nei hawj vunz yied yawj yied mizyinx. Gwqhaenx gou fodfwd siengjdaengz bonjsaw《Dibingzsen Siusaet》, gou nyinhnaeuz， bouxsij mwhde itdingh byaij daengz neix gvaq, de sij gij va haenx itdingh dwg vagwzsangh.

Menh byaij youq gwnz caujyenz， gou youh geiq ndaej miz aen gojgaeq ciuhgeq he lwnhnaeuz: Dangzcauz miz dah lwgvuengz he coh heuhguh Vwnzcwngz gunghcuj, 16 bi haq bae dieg Duboz(seizneix heuh Sihcang). Mwh aendoih soengqbawx byaij hwnj gauhyenz, vagwzsangh song mbiengj roen lumj roxyiuj nei angjhai dwk, dahlwgvuengz raen le sim’angq dangqmaz, dawz gij va neix caemz mbouj dingz. Roxnaeuz dwg yienz- faenh ba, gvaqlaeng, vunz Cangcuz soengq hawj dahsau Bouxgun neix aen mingzdaeuz ndei dingq he—— duj vagwzsangh ceiq gyaeu gwnz gauhyenz! Aen gojgaeq neix hawj raeuz rox, vagwzsangh hix dwg daibyauj yiengh minzcuz daih doxgiet ndeu, nanzgvaiq seizneix Lahsaz Si dingh vagwzsangh guh yiengh va daibyauj aen si neix! Hekyouz baenz bang baenz doih daengz neix, gak cungj gak yiengh guhcaemz hawj daengx aen caujyenz nauhyied hwnjdaeuj. Roxnaeuz souh gij yiengh veihvuj maenh, ak saiganghbah yingjyangj, gyoengq bouxsai maij gwih max roxnaeuz nyingz naq; hoeng gyoengq saulengj ceiq maij co gij buhvaq boux Cangcuz daeuj daenj, dawz bonjfaenh cangguh ‘Cozmaj’ le caiq byaij haeuj geh vagwzsangh bae ingjsiengq, sau lengj va gyaeu yinx vunz haenh raeuh!

Yaek daengz banringz, Cozmaj coi dou hwnjci bae youz gizwnq, lizhai Yihlah Caujyenz, gou miz di doeknaiq. Youq ndaw ci gou caeuq Cozmaj iekdingh: Daengz mwh Yangh- gwzlijlah doeng hojceh, gou lij caiq daeuj neix yawj vagwzsangh.

(sat)

美丽的格桑花