3 nyied 8 hauh ciet mehmbwk, gih raeuz gak dieg gyoengq mehmbwk gawjbanh le gak cungj gak yiengh hozdung daeuj angqhoh ciet “sam bet”. Yungzsuij Myauzcuz Swciyen gawjhengz mehmbwk minzcuz dijyuz doxdax, gyoengq mehmbwk roq gyong、 bau aendomq、 diuqcag, guh gij saujsu minzcuz conzdungj dijyuz doxdax neix daeuj angqhoh ngoenzciet. Bahmaj Yauzcuz Swciyen youq yienhsingz vwnzva gvangjcangz gawjhengz diuq fouxndangcangq doxdax, dawz ndangcangq gyaeundei、 mbaet gwn mbaet yungh、 gangj vwnzmingz comz youq ndangndeu, ndaej daengz vunzlai haenhndei. Hwngzyen Yauyij Cin youq Cinghdungz Cunh guh hozdung, gyoengq mehmbwk daj 10 lai aen mbanj daeuj daengz ndaw cunh doxcomz, guh daeuz lanzgiuz、bengcag、dauq hozbit daengj doxdax hozdung. Yizcouh Si Fulenz bae daengz Liuz Sanhcej Yangh Mbanjdaemzbyamax gawj- banh vwnzyi vanjvei, miz 15 aen vwnzyidonz byaujyenj le 32 aen cezmuz, caeuq dangdieg nungzminz itheij angqhoh ngoenzciet. Doengh gij hozdung neix, yienh’ok le gij cingsaenz funghmau ndangcangq gyaeundei、vwnzmingz、haengjheiq baenaj gyoengq mehmbwk Mbanjcuengh, sawj gyoengqde engqgya saenq swhgeij, engqgya miz saenqsim、 miz naengzlig guh ndei hong swhgeij.

(Cunghhoz)