“Ciet Hawfwen” Nazbah Ciengxlwenx Hoenghhwd

Moix bi liggaeuq ndwen- sam cibloeg, gyoengq beix- nuengx Bouxcuengh rangh Lingzyinz Yen cungj comz youq Cauzlij Yangh Nazbah Cunh, hoenghhoengh hwdhwd banh aen hozdung “ciet hawfwen” moix bi cungj banh mbat ndeu haenx. Ngoenz neix, ndaw mbanj nauhyied angqyangz, sing fwen goksa haprwenz, yienhciengz yienj Heiqcuengh vunz humx yawj ndaetfwd, gwnz diegdangz saeceij fanringx saetyat hawj vunz bek fwngz hemq ndei. Fwen ndei dingq heiq ndei yawj, nauhyied mizyinx, moix bi cungj miz geij cien vunz bae “ganjhaw”.

Ciuq vunzmbanj lwnh- gangj, “ciet hawfwen” Nazbah daj Ciuhsung couh miz lo. Riuznaeuz seizhaenx miz boux ciengginh mingzcoh heuhguh Cwnz Da he, daiq bing bae Sanglinz Dung (Seizneix heuhguh Denzlinz Yen) hoenx Manzvuengz, liggaeuq ndwen- sam cobet loh gvaq Mbanj- nazbah seiz, mehyah boux ciengginh neix gaenq mizndang lij riengzlaeng bae haenx senglwg deng gaz dai lo. Boux hakyienh Swcwngz Fuj (seizneix heuhguh Lingzyinz Yen) vih geiqniemh boux ciengginh neix caeuq mehyah de, guh le aen Miuh Cwnz Da Ciengginh ndeu. Gvaqlaeng, gyoengq vunzlai Lingzyinz、Bwzswz、Denzlinz daengj dieg haenx, moix bi liggaeuq ngoenz ndwensam cobet, cungj bae daengz Mbanjnazbah caeqbaiq boux ciengginh neix, gouz- muengh rumz swnh fwn yinz gohaeux fungsou doihduz ciengx maj, vunzmbanj bingzan saedceij vuenyungz.

Gvaqlaeng gij vunz daeuj caeqbaiq Cwnz Da ciengginh haenx yied daeuj yied lai, daj haetromh baizdoih daengz gyanghwnz caeqbaiq lij caengz sat, ngoenz cobet youh mbouj miz ronghndwen, diemj yuih gaem bogfeiz byaij roenbya maranz gig mbouj ancienz, daihgya couh comz youq gwnz diegnywj henz dah Mbanj- nazbah doiq fwen, dwkgyangq, yienj Heiqcuengh, haujlai daegmbauq dahsau caemh doenggvaq doiq fwen damzyoux. Gvaq geij bi le, miz vunz daez naeuz dawz hozdung caeqbaiq nod laeng 8 ngoenz, dawz ndwensam cibloeg ngoenz ronghndwen ceiq luenz ceiq rongh neix dingh guh ngoenzcaeq Cwnz Da cieng- ginh, caeqbaiq sat le ndaej miz ronghndwen ciuq rongh roenbya maranz. Baenzneix, hozdung caeqbaiq couh bienqbaenz le “ciet hawfwen”, caemhcaiq riuzcienz daengz seizneix, 800 lai bi lo lij hoenghvuengh nauhyied dangqmaz.