□Liuj Anhmingz ingj Sinhyungz hoiz

Ndwencieng, bae Yungzsuij Myauzcuz Swciyen Anhcuiz Yangh Gizman Cunh gvaqcieng, gyoengq beixnuengx Myauzcuz aeu gij fuengsik daegbied gag miz de angqyangz huzndei gvaq cieng moq, hawj gou lwgda yap rongh ndawsim gamjdoengh.

Ndwencieng coloeg, gyoengq vunzmbanj cang ndang moqsup lengjgyaeu, caeuxcaeux couh comz daengz diegdangz gyang mbanj angqyangz laqbiengz, banh luzswngh caijdangz, diuq foux luzswngh, vanq dangzbingj doxcanj gipaeu, cit bauqrengh daengj, hoengh nauh cieng moq, angqyangz vuenyungz.

Ndwencieng cocaet, ndaw mbanj youh hoenghhwd gawjbanh “mangzhauh” soengq fuk aen hozdung conzdungj neix, bouxcoz nem bouxcangq Myauzcuz cang baenz “mangzhauh”, gwnz fwngz cat caengz mijrek ndaemndatndat ndeu, gaem diuz dwngxfaexcuk siengcwngh faexsaenz ndeu, haeuj mbanj con luengq, doq byaij doq gaemh diuzdwngx diuq baenaj fan dauqlaeng, doenggvaq saetdiuq、fandingjbyonj、maeuqyung ninzhaemj daengj dungcoz, bang vunzmbanj gyaep fangz cawz sez, bauj vunzmbanj bingzan; baez raen vunz byaij gvaqdaeuj couh mad mijrek hwnj gwnz naj vunz bae, caeuq vunz gaemfwngz、bekmbaq、umjgot、lumhgyaeuj daengj, cienzsoengq faenh hoh fuk cieng moq, hoh fuk vunzlai fouz cai fouz nanh, seizheiq ndei riengz ndang.

Riuzcienz gaxgonq goengcoj Myauzcuz dangdieg aeu naengfaex deu baenz mauhngeg, daenj fan sen aeu gogaeu go’em san baenz haenx, gwnz naj cat mijrek cang baenz vunzndoeng ndaej gyaep gij caeg’ep ndaw bya dwk haeuj mbanj haenx deuz. Gvaqlaeng, Myauzcai moix bi cungj aeu goenggingq cingj “mangzhauh” ma camgya diuq foux luzswngh caijdangz, gouz aeu seizheiq ndei ndaej fukheiq lai. “Mangzhauh” dwg yaem Vahmyauz, eiqsei dwg doxgaiq gaeuqgeq.

Bineix, ciet “mangzhauh” Gizman Cunh gungh miz 9 duz “mangzhauh”（2 duz iugvaiqlingz、5 duz “mangzhauh”、2 duz hauhnyangj）, gyoengq “mangzhauh” sien diuq foux mangzhauh hwnjdaeuj, gyoengqde ei gij yiengh cae reih rauq naz、doekceh dajndaem、dajndai dajsou daengj, gouzmuengh ndaw bi moq rumz swnh fwn yinz, yienghyiengh fungsou, lij ei gij yiengh ndaw swnghhoz rexruz、gvaq giuz daengj, haenhdanq gij meijdwz beixnuengx Myauzcuz caeuq vunz bonj minzcuz nem aen minzcuz wnq doxsaenq doxbang doxnyiengh doxhuz haenx; yienzhaeuh couh youq sing bauqrengh yiengj bili bala ndawde hainduj buekrengz bae ciengj aeu gij nyodheu siengcwngh seizcin hoenghvuengh、doenghgo doenghduz maj noengq maj cangq haenx, riengzlaeng buet haeuj ndaw gyoengqvunz bae, iet fwngz ndaem- ndat led naj dahsau、loengh raemx daengj, daengx aen hozdung ndeiyawj、nauhyied、angqyangz.