□Hanz Bingjyui ingj Sinhyungz hoiz

Moix bi ndwencieng coit, Sanhgyangh Dungcuz Swciyen Duzdung Yangh Dangzcauz Dungcai daengxgyoengq vunzmbanj cungj comz youq diegbingz naj laeuzgyong, angq gvaq aen ciet gyaep sez conzdungj daegbied ndeu——“ciet gyaep caeg” hozdung, maqmuengh daengx mbanj bibi bingzan. “Ciet gyaep caeg” dwg ngoenzciet conzdungj Dangzcauz Dungcai gag miz, bi 1925 gvaqdaeuj moix bi ndwencieng coit itdingh aeu banh baez ngoenzciet hozdung ndeu. Dieg mbanj Dangzcauz bya sang faex ndaet, ciengzseiz miz bouxcaeg dwk haeuj mbanj, miz bi ndeu ndwencieng coit, bouxcaeg rox ngoenzneix vunzmbanj itdingh gaj mou gvaq cieng, miz noh gwn miz laeuj dep, couh youq ngoenzneix haeuj mbanj ciengjdued, ndaw mbanj boux singq Lungz ndeu daiq vunzmbanj buek hoenx gyaep gyoengq caeg deuz. Gvaqlaeng, vihliux gyaep sez, caemh vihliux son’gyauq daihlaeng mbouj ndaej guh gij saeh haih vunz haenx, couh dingh youq ndwencieng coit banh aen hozdung “gyaep caeg”, maqmuengh bibi ndaej bingzan.

Aenvih gaxgonq dwg boux vunzmbanj singq Lungz he daiqdaeuz gyaep bouxcaeg deuz, ndigah goenglaux ndaw mbanj dingh roengz gvigawj, boux “caegdaeuz” itdingh dwg youz boux vunzmbanj singq Lungz ndeu daeuj cang, yawh muengh lungz ndaej vaq sez baenz gitleih, gij bouxcaeg wnq cix youz gyoengq daegmbauq ndaw mbanj ciuq benq laeuzgyong gwnz gyang laj sam nga vunz doxlwnz cang, moix bi lwnz benq ndeu.

“Ciet gyaep caeg” hozdung itbuen dwg youq baingaiz banh, goenglaux ndaw mbanj daiq vunzmbanj baiq miuh sat le, senhbu hozdung hainduj, seizneix gyonglaz、luzswngh、 bauqrengh couh yiengj gyukgyad, gyoengqcaeg daenj buh- raez mong、fwngz gaem ngafaex gang gyaeuj, youz boux “caegdaeuz” daiq dwk byaij haeuj diegdangz, gyoengq vunzmbanj cix hainduj nyingz cungqsa, eiqsei dwg aeu singcungq gyaep gyoengqcaeg deuz. Bi 1997 cwngfuj dangdieg sou cungq hwnjdaeuj le, vunzmbanj couh gaij yungh sing bauqrengh daeuj lawh cungqsa gyaep caeg lo. Caenh raen gyoengq vunzmbanj gaem baenz roix baenz roix bauhrengh diemj dawz le bae gyaep caeg; mbangj bouxcoz okrog dajgoeng dauqma haenx cix cawx haujlai dangzbingj youq seizneix vanq coh diegdangz, gyoengqvunz couh doxcanj dwk caenx bae gip aeu dangzbingj, eiqsei dwg gip aeu seizheiq ndei.

Gyoengqcaeg deng gyaep ok mbanj le, vunzmbanj couh comz youq diegbingz aen laeuzgyong gyang mbanj, sam nga vunz gak laebbaenz aen luzswnghdui ndeu, doxriengz gonqlaeng byaij haeuj diegbingz, mbiengj guhdaeuz bihaenx sien boq hwnjdaeuj, couh hainduj guh boq luzswngh doxdax lo. Moix aen luzswnghdui cungj miz 30 vunz doxhwnj, diemj lai cung ndawde, sing luzswngh yiengj goksasa haprwenz ndaw lueg, vunzmbanj cix riengz sing luzswngh diuq fouxcaijdangz, nauhyied dangqmaz.

Bouxcaeg deng “gyaep” deuz le, youq rog mbanj “caeg” di byaekheu ndeu banfuemx dauqma yiengq gyoengq vunzmbanj nyinh- coih.Doengxhaemh, moix ranz dawz vanj haeuxnaengj ndeu caeuq gaen laeujhaeux ndeu daeuj, comz youq diegdangz naj laeuzgyong gwn ngaizbakranz, daengx mbanj doxhuz angqyangz.