2 nyied 20 hauh daengz 21 hauh, dwg liggaeuq ndwencieng cib’it、 cibngeih, Denhngoz Yen youq aen ndaw yienh Luzbaiz Cin Mbanjnazdoengh gawjbanh “Ciet Caemzgvej”hozdung, ngoenzde, daihgaiq miz fanh lai vunz camgya hozdung, gyoengq ginzcung Nanzdanh Yen caeuq Dunghlanz Yen hix ganj daeuj yawj aen hozdung neix.

Youq ndaw doenghnaz va byaekyouzceh henjrwgrwg haenx, gyoengq beixnuengx Bouxcuengh ciuq fungsug ndawbiengz Bouxcuengh, yienj duzgvej gouzfuk：Caeq duzgvej, boq loxlez, roq gyonglaz, eu fwen, diuq foux duzgvej, foux cae naz ndai naz, foux dwkbya dwknyauh, foux daemjbaengz daengj, doengh gij neiyungz neix cungj dwg Bouxcuengh feihvuzciz vwnzva yizcanj hanghmoeg.

Geij bi neix daeuj, Denhngoz Yen moix bi cungj banh “Ciet Caemzgvej”hozdung, swnjcienz caeuq baujhoh le minzsuz vwnzva duzgvej, youq rangh Dahnding baujcunz ndaej ceiq caezcienz、ceiq hidungj, yingjyangj ceiq daih, baenz gaiq minzcuz daegsaek vwnzva binjbaiz dangdieg ndeu.

(Liuz Yaujginh)