□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Moz Vwnzvaz cienghginh youq Veiz Gozcingh gvaqseiq le raiz hot sei gig doenghsim vunz ndeu daeuj dauqniemh caeuq haenh boux baengzyouxbing caeuq vunz doengz- mbanj neix, haenh gij goengcik caeuq yienghvunz de：

Din byaij lajdeih roekcib bi,

Cauxnieb baenzgoeng dawz Ginhouh.

Bae bang Yeznanz cingz naekna,

Youq ndaw ciengqyak ok geiq- maeuz.

Ndaej dang daeuz laux mbouj luenh guh,

Gyoengq nuengx youq ranz guh hongnaz,

Binjdwz gvaq vunz caen dijbauj,

Lajmbwn ndiepgyaez ciengx mbouj lumz.

Veiz Gozcingh dang “daeuz laux” le, coengzlaiz mbouj siengj aeu vih vunzranz de maeuz leih’ik. Neix caeuq gyoengq vunz “bouxcawj baenz sien, bit gaeq hwnj mbwn” haenx doxbeij, daiq lwenqda lai lo. Veiz Gozcingh itsim naemj baenzlawz hawj vunzlai Guengjsae ndaej gwn imq, caeux di ndaej gvaq ngoenz vunzlai caez fouqmiz haenx.

Miz boux canghraizsaw Baekging ndeu caeuq bouxraiz gangj gienh saeh mizyinx ndeu gvaq:

Boux vunzraizsaw youq Veiz Gozcingh gvaqseiq le bi daihngeih naengh cifeiz daj Baekging daengz Namzningz, ci daengz Liujcouh seiz, de caeuq geij boux lauxyangh Guengjsae ngamq hwnj ci haenx seizbienh doxging hwnjdaeuj, haemq gyoengqde roxnaj mbouj roxnaj Veiz Gozcingh.

Miz boux Laujyangh ndeu naeuz:“De gaxgonq dwg boux suhgi caeuq cujsiz Guengjsae, byawz mbouj rox, hoeng dou mbouj raen de gvaq.”

Nangq roengzdaeuj, canghraizsaw youh haemq:“Veiz Gozcingh guh ndaej baenzlawz yiengh?”

Lingh boux Laujyangh han neauz:“Fanjcingq de mbouj fat.”

“Mbouj fat dwg maz eiqsei?” Canghraizsaw miz di mbaeng.

Geij boux laujyangh raen cangh- raizsaw ngawh le, cungj riu lo. Gyoengqde naeuz:“Veiz Gozcingh mbouj dawz saek faen ngaenz goenggya oet haeuj daeh de bae, baenzlawz ndaej fatcaiz hwnjdaeuj ne!”

“O!” Canghraizsaw roxnyi lo, ngaekngaek gyaeuj, hix caeuq laux- yangh Guengjsae riuhaha hwnjdaeuj lo.

Veiz Gozcingh ndangseuq mbouj damcaiz, youq Guengjsae bouxboux cungj rox, vunzvunz haenhndei.

(caengz sat)