Ngoenzneix haetromh, gou daiq lwg vaihseng iq bae haw youz. Geij ngoenz neix bouj gyaj yenzdan, ngamq laebdaeb hwnj sat bet ngoenz ban, ndaw sim mbwqmbwtmbwt, gou naemj okbae byaijbyaij, it daeuj ndaej hawj vaihseng simvuen, ngeih daeuj hix cuengqsoeng aensim swhgeij.

Gwnz haw vunz lai vunz daih, gizgiz cungj dwg bouxgai bouxcawx haeujhaeuj okok, dawz diuz gai bonjlaiz couh mbouj gvangq haenx caenx ndaej ndaetfwdfwd.

Dou mbouj nyienh bae giz vunz lai haenx youz, couh vang haeuj ndaw aen cauhsi baihgvaz bae. Haeuj ndaw cauhsi, lwg vaihseng couh cuengqhai fwngz gou, buet bae coh gvihdaiz baij gijgwn lwgnyez haenx lo, gou bouxdog gag youq ndaw cauhsi menh byaij menh yawj dwk.

Gou cienq daengz rangh gai gijgwn saejdaeuz seiz, raen vaihseng gaenq gip ndaej gop maenzndengj ndeu, gou lau vaihseng yied gip yied lai, vih in gij cienz ndaw daeh gou, ganjgip daiq vaihseng bae gyau ngaenz.

Dauqma gwnz loh, vaihseng damznye’nye, yiemz gou cawx maenz- ndengj daiq siuj, mbouj gaeuq de gwn daengz haemh. Gou lau de gwn liux daiq vaiq, couh naeuz: “Daihgya gwn cij van, gag gwn aeu baenz nyan, mwngz aeu louz di he ma hawj daxdaiq cimzcimz cij ndaej.”

Vaihseng gig dingq vah, ngamq yamq haeuj bakdou, couh buet coh daxmeh, gig vaiq dawz diuz maenzndengj oet haeuj ndaw bak daxmeh bae, daxmeh lij siengj doi gangj mbouj gwn, hoeng de baez aj bak, diuz maenzndengj couh deng vaihseng oet haeuj bak de bae liux lo.

Daxmeh nyaij maenzndengj gwn dwk, lienzlienz haenh vaihseng roxsoq, daxmeh ndwnj maenzndengj roengz hoz le naeuz: “Gij maenzndengj neix feih mbouj ndei youh sai ngaenz, beij mbouj ndaej doenghbaez gou guh gij maenzndengj haenx, caj ngoenz lawz miz ndit, gou hix guh di he daeuj hawj sou gwn .”

Dingq daxmeh gangj daengz gij saeh doenghbaez guh maenzndengj haenx, gou myaiz couh hwnj myagmyag lo.

Gij maenzndengj daxmeh guh haenx faen song cungj, cungj he dwg aeu maenzndip daeuj ndengj, cungj neix yungzheih guh, cij aeu miz ndit, haetcaeux dawz maenz swiq seuq ronq baenz gaiq, dawz bae dak, daengz haemh doengh gaiq ronq lai mbang haenx cungj ndengj ndei lo, doengh gaiq loq na di haenx lij caengz ndengj daengz ndaw geijlai, ngoenz daihngeih lij aeu caiq dak baez ndeu. Cungj maenzndengj neix youh hom youh gom, haeb gaemz he haeuj bak gwn,byotcwtcwt, miz feih youh hab bak. Lingh cungj maenzndengj guh hwnjdaeuj lai gaujfanz di. Cungj maenzndengj neix dwg dawz maenz naengj cug le caiq ndengj. Guh cungj maenzndengj neix ceiq ndei youq yaek daengz doengceiq duenh seizgan haenx guh, yienghhaenx maenzndengj saek ndei feih hix lengj. Youq ngoenz ndit haenq haenx, genj aen maenz aen soh youh saed haenx swiq seuq, naengj cug. Naengj maenz seiz, mbouj ndaej naengj daiq naemz, ngamq cug couh ndaej lo, mboujne couh mbouj ndei ronq baenz maenzdiuz. Dawz gij maenz naengj ndei haenx ronq baenz maenzdiuz, baenz rangh baenz rangh baij haeuj ndaw raeng ndaw ndoengj bae, caiq dawz okbae dak. Caj dak ndaej yaek ndengj seiz, couh sou haeuj ndaw oengq bae goemq. Gvaq duenh seizgan he le, baihrog maenzndengj couh hwnj caengz mwi hausag he, seizneix, maenzndengj ceiq ndeigwn, mbouj unq mbouj ndengj, haeb gaemz he daeuj gwn, gij noh ndawde mizmbangj hoengz mizmbangj henj, nyangqnyetnyet, van- subsub, rangrwgrwg. Cungj maenz- ndengj neix ndeigwn youh nyaij ndaej nanz.

Seizhaenx dou cungj lij iq, gyoengq bouxlaux cungj dwg ok caeux dauq laep bae guhhong.Vihliux hawj dou lai miz di maenzndengj daiq bae hagdangz gwn, daxmeh ngoenznaengz bae guhhong, cungj mbouj lumz youq ndaw reih gip doengh aen maenz lauq ma, gaeq haen byongh hwnz youh mo laep hwnqcongz daeuj ronq maenz, dak ndei le cij bae guhhong. Caj dou cuengqhag caeuz dauqma le couh sou maenzndengj ma ranz.

Seizhaenx gwnzhaw lajmbanj cungj mbouj miz gijmaz saejdaeuz gai, lwgnyez ndaej gwn maenzndengj couh dwg gij saejdaeuz ceiq ndei lo. Geiq ndaej seizhaenx dou bouxlawz bae sou maenzndengj, cungj ndaej nyaeb gwn doengh gaiq mbang ndengj ndaej caeux haenx, vih aeu ndaej bae sou maenzndengj, dou geij beixnuengx cungj miz nyangqbak gvaq le !

Seizneix gwndaenj yied ngoenz yied ndei lo, daxmeh caiq hix mbouj yungh sinhoj bae guh maenzndengj lo, siengj mbouj daengz seizneix maenzndengj youh baij youq ndaw cauhsi, hawj gou youh siengj hwnj gij maenzndengj daxmeh guh haenx lo……

难忘红薯干