靖西壮锦 锦上添花

□Cau Ginghvuj ingj/sij Sinhyungz hoiz

Mancuengh dwg gaiqbauj vwnzva Bouxcuengh, ndaej haenh dwg guek raeuz seiq cungj man ceiq mizmingz ndawde cungj ndeu, cungj gunghyibinj gyaeundei aeu maefaiq roxnaeuz maesei daemj baenz neix, fap daemj sengdoengh, gezgou yiemzgaenj, lai saek lai yiengh, daiq miz cungj gwzdiu minzcuz angqyangz、sangjswt ndeu, yienh’ok beixnuengx Bouxcuengh raeuz haenqrengz bae cimhra caeuq maqmuengh saedceij gyaeundei.

Mancuengh dangguh cungj baengzdaemj meijsuz gunghyi ndeu, dwg cungj cauxguh vwnzva ceiq gyaeundei beixnuengx Boux- cuengh raeuz, gij lizsij de caemh gig gyaenanz. Caeux youq Ciuhhan Diegcuengh gaenq rox daemj man, gij baengzdaemj caencingq ndaej heuhguh “Mancuengh” haenx dwg youq Ciuhsung, daengz Ciuhmingz daemj ndaej engq ndei yawj, gij Mancuengh daemj miz doz duzlungz duzfungh haenx baenz cungj baengzdaemj cienmonz soengq hawj cauzdingz ndeu. Seiz Ciuhmingz Ciuhcingh, Mancuengh cawz soengq hawj cauzdingz le, beksingq caemh ndaej yungh de, lumjbaenz najdenz、najnda daengj. Ginggvaq cien lai bi fazcanj, seizneix Mancuengh gaenq miz sam daih cungjloih、20 lai aen binjcungj caeuq 50 lai cungj dozanq, aeu gietsaed naihyungh、fap daemj man cinggiuj、dozanq daegbied、raizva gyaeundei okmingz. Mancuengh ndawde, suenq man Cingsih ceiq gyaeundei, ceiq miz minzcuz daegsaek, Cingsih Yen “Fap daemj man Bouxcuengh” 2006 nienz ndaej lied haeuj buek daih’it guekgya gaep feihvuzciz vwnzva yizcanj mingzloeg; Cingsih Yen Man- cuengh Cangj 2011 nienz gonqlaeng ndaej ndaw gih caeuq guekgya vwnzvabu laeb guh Gvangjsih aen daih’it feihvuzciz vwnzva yizcanj swnghcanjsing baujhu sifan gihdi. Doengh bi neix daeuj, Cingsih Yen gyarengz haifat baengzdaemj Mancuengh, cawz mannajdenz、mannajnda、man- daehbeq le, lij haifat le mandamj、manvenj、mandaiz daengj binj- cungj, swnjcienz caeuq gya’ndei le fap daemj man, canjbinj youq ndaw gih rog gih gai ndaej bieng, gai bae daengz Gangj Au caeuq Sinhgyahboh、Meijgoz、Gyahnazda daengj guekgya caeuq digih, gyoengq bouxcawx cungj gig haengjgyaez.