少数民族过春节各具独特风采

□Yiz Fangh ingj/sij Sinhyungz hoiz

Cungguek dwg aen guekgya miz minzcuz lai ndeu, cawz Bouxgun le lij miz 55 aen saujsu minzcuz. Gyoengqde yienznaeuz vah、saw mbouj doxdoengz, swnghhoz fuengsik caeuq fungsug sibgvenq cix mbouj doxdoengz, hoeng gyoengqde dingzlai cungj dawz ndwencieng dangguh ngoenzciet hung bonj minzcuz daeuj angq hoh, caemhcaiq ciuq gij fungsug sibgvenq bonjfaenh, aeu gij fuengsik mbouj doxdoengz haenx “angq coux angq gvaq cieng moq”, banh gak cungj gak yiengh angq hoh hozdung, minzcuz daegsaek naekgywg, nauhyied hoenghhwd dangqmaz.

Bouxcuengh raeuz gvaq ndwencieng, dwg daj haemhndaep gvaq daengz ndwencieng cibngux, ngoenzciet hoenghhwd nauhyied. Cawz ngoenz haemhndaep gaj gaeq gaj mou loengh haujlai byaek daengx ranz vunz comz gwn caeuz, caez byoq feiz gangjgoj yawj densi deq cieng moq daeuj daengz le, ngoenz haemhndaep、coit cungj aeu guh ceiz suek faengx, haet coit gyoengq mehmbwk cungj hwnq caeux bae aeu “raemxmoq”; ndaw cieng cawz bae’mbanj cunz youx le, gyoengq hauxseng lij angq doiq fwen、dwkdomq、dwkgyangq、dwkgiuz、diuq foux yienjheiq, mbangj dieg beixnuengx lij doxcomz dwklongj、foux vaizcin, ndwencieng gvaq ndaej angqangq yangzyangz.

Beixnuengx Cangcuz dwg ciuq gij lig minzcuz bonjfaenh gvaq Ciengcang, itbuen dwg ndwencieng Bouxgun gvaq geij ngoenz le daeuj daengz. Haemh gonq haemhndaep, daengngoenz yaek doekbya seiz, gyoengqde ranzranz cungj dawz raemxuq buek coh baihsae, hawj gij doxgaiq uq haenx riengz daeng- ngoenz doekbya cawz bae seuqsat, byaujsi biek gaeuq coux moq. Ngoenz haemhndaep, gyoengqvunz gwnz ndang daenj moqsak, daep mauhngeg, roq gyong boq loxlez hoenghhwd dwk banh “diuqsaenzhoih”. Doengxhaemh angqyangz dwk humx naengh, gwn bingjyouz、bingjcijvaiz、nohfwngz- vax, doxgingq laeujhaeuxmeg, doxsoengq hahdaz, ciengq go diuq foux, angq hoh cieng moq.

Beixnuengx Bwzcuz gvaq cieng moq seiz, hoengh banh cungj hozdung heuhguh “cuengqhwnjsang” ndeu, couhdwg youq ndaw hoh faexcuk cang siu haeujbae, diemj dawz le ndaej hawj gofaexcuk bonghmbin hwnj baenz bak ciengh sang, neix couh cingqcaen “hwnjsang” lo. Gyoengqde aeu gijneix daeuj angq hoh cieng moq, maqmuengh ndaw bi moq bouxvunz ndang ndei miz rengz, guh yienghyiengh cungj baenz.