Miz vunz gyaez seizcin va hai roeg hemq, miz vunz ndiep seizhah ndathwng lumj feiz, miz vunz vih seizcou fungsou angqyangz angqhoh, gig noix miz vunz ndiepgyaez seizdoeng,vihmaz ne? Aenvih seiz- doeng lumj duz saeceij hung ak nei, de baez aj bak, gaemz heiq haenx couh lumj yaek coi mwngz laemx bae nei. Baez yamq haeuj seizdoeng, rumzbaek cihuhu, nit ndaej fwngz yaek goenq, rwz yaek doek bae, nit ndaej gyoengqvunz cungj ndoj youq ndaw ranz mbouj haengj okdou. Daihgya cungj maqmuengh youq seizdoeng miz daengngoenz hwnzngoenz venj youq gyangmbwn, seizseiz ciuq dwk gwnz dieg raeujrubrub. Hoeng aen daengngoenz seizdoeng couh lumj caeuq gyoengq vunz guh yahndoj nei, nanznanz cij haengj loh baez naj he.

Danhseih, miz vunz hix youq ndaw seizdoeng ra ndaej daengz aen daengngoenz bw! Aen daengngoenz seizdoeng gyoengqde dwg ngoenz- ngoenz venj youq gyangmbwn hane.

Geiq ndaej miz cit goj he yienghneix naeuz: Gaxgonq, mbwn- saenz youq seizdoeng nitgyoet seiz soengq song yiengh doxgaiq hawj song boux vunz gag senj daeuj fuengz nit, yiengh ndeu dwg fag fouj he, yiengh ndeu dwg fan denz nanwtnwt he. Miz boux ndeu ganjgip genj aeu fan denz haenx, lingh boux cix riunyumnyum gaem fagfouj haeuj ndaw fwngz daeuj. Gyoengqvunz cungj you boux ndaej fouj haenx, ngeix mbouj doeng de vihmaz ndaej fag fouj mbouj miz yungh neix lij angq baenzneix.

Doeklaeng, boux aeu fandenz haenx ngoenzngoenz youq ranz hoemq denz guhraeuj, boux aeu fagfouj haenx ngoenzngoenz gwed fouj hwnj bya bae raemj fwnz coemh danq, de banngoenz mbouj roxnyinh nit, banhaemh miz danq byoq. Gvaq mboengq he le, gyoengqvunz geizheih dwk raen daengz boux genj fandenz haenx cix ciengzseiz nit ndaej saenzdeded, boux genj fagfouj haenx dauq yied daeuj yied maenh’ak, ndangdaej cangqcuk, naj youzyubyub. Neix dwg boux genj fouj haenx ndawsim venj miz aen daengngoenz ndongqyamyam lumj goengfeiz dawzyubyub, ciuq ndaej de raeujrubrub.

Youq aen seizdoeng youh nit youh gyaengj haenx, raeuz aeu gag rox bae ra aen daengngoenz venj youq gwnzmbwn swhgeij, yienghhaenx cix ndaej youq ndaw seizdoeng gamjdaengz sim raeuj ndang ndat mbouj deng nit. Ndaw densi baudauj gvaq: Bouxlaux gaenq miz caetcib lai bi he, lij daenj dauq buhvaq yindung gengud ndeu, youq ndaw diegnae hausagsag nanwtnwt haenx caeuq gyoengq lwgnyez hoenx giuznae, de buet bae buet dauq, angq ndaej lumj laeq lwgnyez he nei. Boux gicej he gvaqbae cam bouxlaux nit mbouj nit, bouxlaux mienh “hoenx ciengq” mienh dap naeuz:“Mbouj nit law, seizneix daengx ndang lij biu hanh ne.” Bouxlaux lij doiq gicej naeuz, de bi seiq geiq cungj lienh ndangdaej, mboujguenj rumz ci fwn doek, seizaeng seiznit, cungj mbouj dingz gvaq. Seizneix yienznaeuz nienz geq lo, lij ngoenzngoenz lienh, couh yienghneix, de menhmenh lienh baenz aen ndang cangq he, hix lienh ok goengfou daegbied mbouj lau nit neix. Youq ndaw sim bouxlaux, gwnzmbwn seiz- seiz venj miz aen daengngoenz de, hoengzfwgfwg, ronghsagsag.

Dwg ha, gwnzgyaeuj gyoengq- raeuz cungj gak miz aenmbwn swhgeij, aen mbwn neix caeuq aensim mwngz doxlienz doxgeuj. Aensim mwngz doek fwn, aenmbwn couh mbouj rox bienq rengx; aensim mwngz rumz geuj fwj lanz, aenmbwn couh byaj maenj- humhum; aensim mwngz doek nae mbouj dingz, aenmbwn couh bienq ndaej mbwn nit deih gyaengj……Gyanghaet ranz rongh hai da daeuj, mwngz couh menhmenh ra aendaeng- ngoenz venj youq aenmbwn gwnz dingjgyaeuj ba, ra ndaej raen de, mwngz couh dwg ra ndaej goeng feiz dawzyubyub haenx lo; ra ndaej raen de, mwngz cix dwg youq ndaw seizdoeng ra ndaej raeujrub; ra ndaej raen de, mwngz cix rox guekcoj raeuz aen daengngoenz mbouj rox doek haenx seizseiz youq henz ndang mwngz raeujrubrub……

Daengngoenz Seizdoeng

冬天的太阳

□ Cinz Lisinh/覃丽新