□Vangz Sinhyungz sij/ingj

Youjyizgvanh gou bae haujlai baez gvaq, gamjsouh cix mbat mbouj doengz mbat, gij yiengh gij hoenz diegde, hawj vunz yinsieng laeglwd.

Youjyizgvanh dwg guek raeuz gouj aen gvan mizmingz ndawde aen ndeu. Baihswix laeuzgvan dwg ciengzsingz Byacojbiz, baihgvaz dwg ciengzsingz Byayoufuj, lumjbaenz duz nuem hungloet ndeu nei hotlienz song goengq byasang, heiqseiq hungloet gvangqlangh, dieg youq gih raeuz Bingzsiengz Si baihsaenamz, 322 roenguek gyaeujbyai de con gvaq dougungj Youjyizgvanh, caeuq goengloh Yeznanz doxciep, dwg diuzroen dieghawq youqgaenj doeng bae Yeznanz caeuq guekgya itloih baksok.

Youjyizgvanh dwg guek raeuz aen gvan youqgaenj henzguek baihnamz louz ndaej haemq ndei ndeu, ceiq caeux youq Ciuhhan gizneix couh laeb aen’gvan lo, seiz Ciuhmingz、Ciuhcingh caepguh ndaej engq maenh, daengz seizneix gaenq miz 2000 lai bi lizsij. Gwnz lizsij gvanmingz caemh heuh miz haujlai cungj gvaq, Ciuhmingz bisenhdwz (1428 nienz) cij gaij heuh Cinnanzgvanh; 1953 nienz gaij heuh Muznanzgvanh, 1965 nienz ginggvaq Gozvuyen baecinj, cingqsik dingh gvanmingz guh “Youjyizgvanh”.

Benz hwnj aen laeuzgvan Youjyizgvanh cunzyawj, gij lizsij gaeuqgeq youh hungmbwk de cix yap haeuj lwgda daeuj ndonj haeuj ndaw ukngviz bae. Youq gizneix, mwngz ndaej roxyiuj gij lizsij Cinnanzgvanh hoenxhingz、Cinnanzgvanh gijyi caeuq geiznding baek hwnj Cinnanzgvanh haenx, roxyiuj duenh seizgeiz Cungh Yez doxndei lumj beixnuengx haenx. Ndwn youq henz diuzbaengh laeuzgvan, yawj coh baihnamz, mwngz lumj ndaej yawjraen gyoengqbing Ciuhcingh youq cienglingj okmingz Yangz Yigoh、Suh Yenzcunh、Fungz Swjcaiz daiqlingx lajde buekhoenx vunzdig bing Fazgoz haenx, lumjbaenz lij dingqnyi gij sing hemq roemx sing bauqdoj sing doxfaeg doxyoek seizhaenx hap rwenz byonghmbwn caeuq ndaw lueg; ndaej yawjraen bi 1949 ndwen 12 ngoenz 11 banringzgvaq, mbaw geizbing betit Cungguek Yinzminz Gaijfangginh baek hwnj le gwnz dingj laeuzgvan, ndaw gyaiq Guengjsae daengz seizneix ndaej gaijfang liux. Vihliux ngoenz neix daeuj daengz, gyoengqlwg Cunghvaz minzcuz bouxgonq roemx bouxlaeng riengz dwk dai bae diuz mingh dijbauj bonjfaenh, gij mingzcoh gyoengqde ciengxlwenx gaekgeiq youq gwnz laeuzgvan hungmbwk neix.

Laeuzgvan Youjyizgvanh youq ndaw daihbauq digozcujyi ciemqhoenx ndawde deng doemqvaih song baez gvaq. 1957 nienz ciuq yiengq gaeuq de dauqlingh hwnjguh. Gingjgih Youjyizgvanh baugvat laeuzgvan、ciengzsingz、bauqdaiz gwnz bya、Ciuhcingh satbyai Gvangjsih Cienzbien Duisinsuj (laeuz yienghranz Fazgoz) caeuq aenmoh fanh vunz Ciuhcingh daengj, menciz gungh miz 250 fanh bingzfanghmij. Moix bi miz 10 fanh vunzbaez bae yawjngonz. 2006 nienz, ndaej Gozvuyen dingh guh daengx guek cungdenj vwnzvuz baujhu danhvei.