武鸣县仙湖镇中桥小学 六（3）班 覃姿铭

Gou dwg go faexhung ndeu, gaej yawj gou ndang coek, vifung vutvut, hoeng youq dangqnaj vunz lajmbwn, gou cix gamjdaengz fouznaih.

Gou seiz lij iq, caen mbouj yungzheih. Lij geiq ndaej gou ndaej song bi seizhaenx cingq dwg seizcin, gou daegbied mbouj yungzheih maj ok geij mbaw, did ok geij nyez, hoeng miz ngoenz ndeu, geij daeg lwgnyez manzgyaengq dawz gou gaemh roengzdaeuj, euj seuqsat. Gij in haenx, daengz seizneix gou cungj mbouj lumz.

Cibhaj bi bi haenx seiz- hah, gou cingq dwg lwgnyez cauq, ndang gou gaenq hung lumj aen doengjraemx lo. Gou miz aen mauh gig hung- loet, doengx- ngoenz, gou cw raemh cauh yangjgi hawj vunz; doengxhaemh, gou aemq ndaundeiq daiq ronghndwen, vih vunz lajmbwn hen ranz hen dieg. Gij nye gou, gij mbaw gou, cungh dwg vih vunz lajmbwn guh gungyen. Seiz vunzlai mo gou, gou gamjdaengz cibfaen angq caeuq vuenyungz. Hoeng vunz lajmbwn mbouj gingq gou, gyoengqde ciengzseiz yungh dietcanj dub gou, dawz vaiz dawz yiengz lamh youq gwnz dang gou, vaiz goed yiengz henx gyoengqde cungj mbouj guenj, lij ciengzseiz youq henz ndang gou lwnhnaeuz yaek raemj gou. Gou ciengzseiz lau dwk gaemzheiq hung cungj mbouj gamj diem. Gou cienz ndang cungj dwg sieng, dauqcawq cungj dwg lwed, gwnzndang ca mbouj geijlai byoengq cien congh fanh congh lo, hoeng coengzlaiz mbouj gamj ienq vunz lajmbwn, gou maqmuengh gyoengqde ndaej hojlienz gou, hawj gou ndaej an’onj di, hawj gou ndaej lai lix geij ngoenz.

Gou ciengzseiz yawjraen gij beixnuengx gou ngaiz vunz lajmbwn yungh cax fouj bag raemj dwk sigsanq, mizmbangj aen ndang lij ngaiz faeg soiq bae, caen hawj gou lau raixcaix. Gou moix ngoenz cungj gvaq ndaej youh in youh dungxcieg. Gou mbouj sai mbouj mbwk, vunzgyonz gag youq, yienz- naeuz gou ndaej samcib lai bi lo, lij dwg hauxseng cauq. Gou ndaej dangj rumz dangj fwn, ndaej re raemx namh louzsaet. Gou caeuq gyoengq doengzdoih gou doengzcaez ndaej hoenx- hingz doemboenq, caeuq nywjiq itheij sawj diegsa bienqbaenz saekloeg, caemh- caiq ndaej hoenxhingz rumzgeujgaeq. Gou caen mbouj mingzbeg, vunz lajmbwn vih gijmaz buqvaih raeuz? Aeu rox, buqvaih raeuz hix dwg buqvaih vunz lajmbwn swhgeij ha!

Gou gig fouznaih ha!

(指导老师: 潘彩波)