Mboengqneix daeuj, givwnh laebdaeb doekroengz, mbwn nit dangqmaz. Hoeng, gyoengq hagseng Lungzlinz Gak Cuz Swciyen Dwzngoz Yangh Lungzdung Vanzsiuj cix roxdaengz raeujrubrub, aenvih, youq ngoenznit daeuj daengz gaxgonq, Gvangjsih Gvangjbo Densi Gisuz Cunghsinh couh soengq 50 dauq gyaqcongzdiet song caengz caeuq 300 fan denz moqcancan nanwtnwt hawj aen hagdangz youq diegbya dieg- nit neix lo, gaijgez le hagdangz gyaqcongz noix caeuq gyoengq hagseng youq hagdangz ninzraeuj vwndiz. Baez giensoengq neix, miz 287 boux hagseng youq hagdangz gwnninz haenx ndaej hoemq le fandenz moq, hawj gyoengq lwghag Myauzcuz ndaw bya soengq daeuj raeujrub, sawj gyoengqde ndaej onjsim youq hagdangz doegsaw.(Loz Mingzgauj)