□ Siuh Fazlingz ingj/sij Sinhyungz hoiz

Lanzdenyauz dwg Yauzcuz nga ndeu. Ciuq fungsug gietvaen conzdungj, Lanzdenyauz itbuen mbouj caeuq aen minzcuz wnq gietvaen, dingzlai youz bohmeh guhcawj, siengq sau、cingj moiz、roengzdingh、aeu “cihbet”、dingh ngoenzndei ciepyah daengj cungj dwg bohmeh bae guh, daegmbauq caeuq dahsau daengz ngoenz gietvaen cix mbouj raennaj gvaq. Daengz seizneix, Lanzdenyauz Lingzyinz Yen lij ciuq fungsug gietvaen conzdungj bae banh vaenlaex.

Haemh gonq ngoenz ciepyah, ranz sai couh cingj boux moiz sai caeuq boux moiz mbwk ndeu、seiq boux mbauqsau、doihloxlez buenx bae ranz sau ciepyah, youq bakmbanj ranz sau deng vunzmbanj “laengz” aeu ngaenzroen、bakranz dahsau deng “laengz” dap fwen le, daegmbauq caeuq bouxbuenx cij ndaej haeuj ranz sau, doihloxlez caeuq gyoengqvunz ciepyah cix louz youq bakmbanj boq loxlez eu fwen gyukgyad cigdaengz yahmoq ok- daeuj. Daegmbauq caeuq bouxmoiz bouxbuenx haeuj ranz sau le, goengdauh couh hainduj diemj yieng nam ging, hai bingz laeuj ranz sai daiq daeuj ndeu, daihgya couh youq ndaw ding hung doxlwnz gingq laeuj, nda daizraez gwn caeuz.

Bawxmoq Lanzdenyauz itbuen youq banringz okdou, ndangdaenj gyaeundei yahmoq daenj moqsup, youz beixnangz roxnaeuz dahcej aemq ok douranz, din mbouj ndaej bungq deng giemxdou. Ok bakdou le daxmeh lij bwnq gaemz haeuxnaengj hajsaek ndeu hawj bawxmoq、yahbuenx gwn, byaujsi dahlwg okdou diuzroen gyae’gyangq, daengx ciuh bingzan! Bawxmoq ok bakdou daengz bakmbanj duenh roen neix, lij aeu gvaq roek gvan cij ndaej, gyoengq lwgsau ndaw mbanj aeu diuz saihwet bonjfaenh san haenx lanz loh gingq laeuj, bouxbuenx gwizmoq ciep gwn liux cij ndaej gvaqbae, gwn mbouj ndaej laeuj aeu eu fwen haenh gyoengqsau angq le cij ndaej gvaq.

Bawxmoq ma daengz ranzgvan le, goenglaux ndaw mbanj couh cujciz aen yizsi gvanbaz moq baiqdangz, baiqdangz sat le soengq bawxmoq haeuj rugmoq, seizneix bouxgvan cij caencingq raen fajnaj bawxmoq; loxlez、aenhauh、gyonglaz、bauqrengh cix riengzdwk yiengj gyukgyad, caencik baengzyoux humx naengh youq henz daiz gwn laeuj angq hoh, gyoengq lwgsau ndaw mbanj cix baij daiz、gingq laeuj、nip byaek daihhek, mbauqsau doiq fwen, nauhyied dangqmaz.