“Cing ha, vaiq hwnqdaeuj, yaek cizdau lo……” Gou dap le sing ndeu, fan mbat ndang ndeu youh ninzndaek lo. Daxmeh yawj gou mbouj doengh, couh rag gou hwnjdaeuj naeuz: “Vaiqdi, caiq mbouj hwnqdaeuj couh mboujmiz seizgan roi gyaeuj hawj mwngz lo!” Lijndei daxmeh dinfwngz vaiq, gou hanh lae byombyom buet daengz hagdangz, caeklaiq mbouj cizdau.

Ngoenz singhgiz, daxmeh naeuz:“Cing ha, raed byoem mwngz bae ba! Byoem mwngz youh lai youh raez, moix ngoenz roi gyaeuj cungj aeu yungh cib lai faen cung lo……” Mbouj caj daxmeh gangj sat, gou couh gipmuengz naeuz:“Mbouj raed! Gou cix mbouj raed ne!” Daxmeh youh naeuz: “Cing ha, mwngz lij dwg raed bae ba, yienghneix mwngz moix ngoenz couh ndaej lai ninz cib faen cung lo.” Gou dingq le ngauzngauz gyaeuj naeuz:“Lwgsau raed byoem le couh mbouj gyaeundei lo, caiq gangj hwnj daiz biujyienj couh lwnz mbouj daengz gou lo. Ngoenzcog gou hwnq caeux di couh ndaej lo.” Danhseih, daengz ngoenz daihngeih, gou youh hwnq mbouj ndaej lo……

Miz ngoenz ndeu, daxmeh doiq gou gangj:“Cing ha, mwngz roxnaeuz ndang mwngz vih gijmaz yienghneix ca lwi?” Gou ngauzngauz gyaeuj. “Neix dwg caeuq byoem mwngz mizgven.” Gou geizheih dwk yawjyawj daxmeh. Daxmeh youh naeuz: “Gou naeuz mwngz nyi, byoem rox ndoet lwed, daegbieg dwg lumj byoem mwngz youh lai youh raez haenx, ndoet gij lwed engq lai.” Gou doiq gij vah daxmeh buenq saenq buenq mbouj saenq, cijndei gangj:“Singhgiz laeng caiq raed ba!” Gou fan sat gij saw ndaw ranz, hix ra mbouj raen “byoem ndoet lwed” gij gohyoz yihgi haenx, gvaq le geij ngoenz, gou bungzdaengz doengzhag daxmeh Vangz Hing, de dwg boux canghyw, gou couh cam de, de riu dwk naeuz: “Mboujmiz yiengh gangjfap haenx. Danhseih, byoem rox ndoet gij yingzyangj ndaw ndang vunz, daegbieg dwg gij byoem youh lai youh raez couh ndoet engq lai. Vunz ndang mbouj ndei, mbouj wnggai laeuz byoem raez.” O! Yienzlaiz dwg yienghneix ha!

Danhseih……Ai! Gou dauqdaej raed mbouj raed byoem gou ne?

（指导老师：赵连佩）