Bi’gvaq, Lingzyinz Yen doengh- gij hoh ndaem caz ndaej fungsou. Lingzyinz Yen Cwngfuj 1 nyied 4 hauh naeuz, bi’gvaq Lingzyinz Yen daengx yienh cazsauj canjlieng 4159 dun; canjciz 23111 fanh maenz, beij bi’gyai doengzgeiz demhwnj 49.1%; doenghgij hoh ndaem caz moix hoh souhaeuj 18055 maenz, moix boux souhaeuj 4012 maenz, beij bi’gyai demhwnj 30.6%.

Hawj suencaz cawz rum、raed ngeiq、mbak namh、dwk bwnh……cingq dwg seizdoeng, youq ndaw suencaz heuswdswd haenx, doengh- boux ndaem caz cingq nyaengq ganq gocaz.“Ranz gou ndaem 10 moux caz, bi souhaeuj 2 fanh lai maenz. Ndwenit ndwenlab mbak namh liux, daengz seizcin gocaz couh maj ndaej engq ndei, canjlieng engq lai, engq ndei mbaet.” Gyanghgwng Cunh boux ndaem caz Veiz Yizgaih naeuz.

Dangqnaj, Lingzyinz miz 11.2 fanh moux suencaz, ndaej mbaet 8.6 fanh moux, cujyau comz youq Yihungz、Gyahyouz、Sahlij、Cauzlij daengj 6 aen yangh(cin), gij gihdi baenzrangh dajndaem 500 daengz 1000 moux haenx miz 48 aen, cien moux doxhwnj haenx 25 aen, daengx yienh gungh miz mbawcaz gyagoeng giyez 110 lai aen, guekgya gaep nungzyez canjyezva cungdenj lungz- douz giyez aen he, daengx yienh miz 11260 hoh 50428 vunz guh hong ndaem caz、guh caz、gai caz daengj caz canjyez swnghcanj fuzvu, ciemq daengx yienh vunzsoq 1/4 doxhwnj.

(Luz Cianh Vangz Yenzyungz)