风光秀丽的德夯苗寨

□ Daeghangh ingj/sij Sinhyungz hoiz

Youq ndaw funghgingjgih Sienghsih gyaeundei yinx vunz neix, miz aen Myauzcai heuhguh Dwzhangh ndeu gig yaprongh lwenqda. “Dwzhangh” dwg Vahmyauz, eiqsei dwg lueglaeg gyaeundei, liz Huznanz Swngj Sienghsih Dujgyahcuz Myauzcuz Swcicouh soujfuj Gizsouj Si 26 cienmij gyae. Myauzcai youq cungqgyang funghgingjgih Dwzhangh, aenmbanj ing bya caepguh, bya sang hophumx raemxdiuqdat gotumj, aenranz yiemz ngaeunguemj, faexloeg goemqcw loq raen loq mbouj raen, sanranz sangvid, laeuzcanx baizle, aencueng deuva, yienghsiengq geizheih daegbied, gij saek cix lai cungj lai yiengh, yienj ok gij dungxcaiz laeglwd vunz ciuhgeq Myauzcuz.

Gizneix dwg gizdieg saenzgeiz ndeu, ndaw gingjgih diuzrij vangvet laeret, lueglaeg raemhrwd, raemxdiuqdat mbindoek, aen Raemxdiuqdat Liuzsah sang baenz 216 mij haenx lumj diuz saihau mbin youq byonghmbwn, lumj diuz vunjhau venj youq bangxdat. Gizneix byasang beij gyaeu, Byabanzguj haijbaz 700 lai mij, dingjbya yiengh lumj lwggyoh nei, faen aen hung aen iq, gwnz dingj gvangq 5 gunghgingj baenzneix, dwg benq ndoengfaex ciuhnduj nga doxlaenz rag doxgeuj ndeu; seiqhenz faqdat daengjdwt, yawj mbouj raen daej; ndwn gwnz dingjbya, ndaej yawj doh gij gingjsaek seiqhenz. Gizneix miz giz diegyawj goengloh geizheih okmingz ndeu, couhdwg aen ngamzbya ceiq yungyiemj diuz goengloh Siengh Conh—Aijcai Dienyiemj, daj dinbya daengz dingjbya cij miz 6 cienmij, cix aeu baenq 13 giz utvan, goengloh lumj diuz saihau neix gvaenxgvax youq gwnz byaloeg, hai ci youq gwnz loh, iet fwngz ndaej vax aeu gij fwj mok hausak rog cuengci.

Beixnuengx Myauzcuz mbanj neix daengz seizneix lij louz miz gij fungsug sibgvenq gaeuqgeq haenx, lumj ndwenseiq cobet diuq fouxgyong、ndwensam cosam comz eu fwen、ganjcou、cieplungz daengj fungsug yinx buek dem buek hekyouz ndaw guek rog guek bae ngonzyawj.