（ciep geiz gonq）

Sai:Ndaej rox nax ndang mbaeu,

Nyaenx song raeuz cix angq;

Gou daegdog vunzlangh,

Muengh naxgyangh(gyaeundei)

ma riengz.

Gaeqboux gyang mbanj langh,

Raen duzhangh cix ngaeu;

Ndaej rox nax ndang mbaeu,

Nyaenx song raeuz cix angq.

Daekmax gyaeq gwnznga,

Muengh aengya byoeg dangh;

Gou daegdog vunzlangh,

Muengh naxgyangh ma riengz.

Mbwk: Neix song raeuz ndangndeu,

Deb mbouj reuz aenmoq;

Miz byaek cix aeu coq,

Siengj guh boh cix naeuz.

Va’ngaeux caengz byawz hah,

Nohsae ngah cix deu;

Neix song raeuz ndangndeu,

Deb mbouj reuz aenmoq.

Byaek cix gwn singjsien,

Dukgaeuz yien guh soh;

Miz byaek cix aeu coq,

Siengj guh boh cix naeuz.

Sai:Raeuz gangj vah haeujhing,

Mae ndaej cim guhdoih;

Roegraeu nomj baenz doiq,

Duzfungh boiq duzvuengz.

Boux ciengq boux cix dap,

Bauh faex gyap cix mbin;

Raeuz gangj vah haeujhing,

Mae ndaej cim guhdoih;

Caeuq nax ndaej caemhdin,

Gyang haemh ninz yax noix;

Roegraeu nomj baenz doiq,

Duzfungh boiq duzvuengz.

Mbwk:Raeuz ciengq beij baenz cingz,

Dujva nding vunz ngaeq;

Nengzgengz riengz daekdaeq,

Baenz bohmaex couh ndei.

Boux ciengq boux youh maengx,

Sing mbouj daengx mbouj dingz;

Raeuz ciengq beij baenz cingz,

Dujva nding vunz ngaeq.

Ngoenzlaeng raeuz doxbungz,

Coih aenrungz duzgaeq;

Nengzgengz riengz daekdaeq,

Baenz bohmaex couh ndei.

(sat)