诸葛亮青年时代隐居的地方——古隆中

□ 东基 ingj/sij Sinhyungz hoiz

Lungzcungh ciuhgeq youq gvaengz Byasihsanh baihsae Sienghyangz Huzbwz Swngj, Sam- guek seizgeiz boux cwngci’gyah、ginhsw’gyah okmingz Cuhgoz Lieng mwh seiz coz (17-27 bi) youq gvaq. Gwnz lizsij gienh saeh Liuz Bei sam lieb ranzhaz okmingz neix caeuq maeuzveh hoenghvuengh Ciuhhan “Fapdoiq Lungzcungh” couhdwg youq gizneix fatseng. 1994 nienz ginggvaq Gozvuyen saemjdingh lied guh guekgya AAAA gaep funghgingjgih, 1996 nienz ndaej Gozvuyen lied guh daengx guek cungdenj vwnzvuz baujhu danhvei.

Cuhgoz Lieng seizhaenx youq Lungzcungh doegsaw guhhong nanz baenz 10 bi seizgan. Cuhgoz Lieng bonjlaiz dwg vunz Sanhdungh Langzyaz, lij iq bohmeh couh gvaqseiq, 17 bi seiz riengz bohlungz daeuj daengz Sienghyangz Lungz- cungh, doegsaw guhhong, louzsim saehcingz gwnzbiengz, ndaej heuh- guh “bamqlungz”. Doeklaeng Liuz Bei daeuj daengz ranzhaz de sam baez, Cuhgoz Lieng cienzmienh faensik le gij seizheiq lajmbwn faen sam faenh seizhaenx, daezok le aen geiqmaeuz dungjyiz daengx guek ndeu, neix couhdwg 《Fapdoiq Lungzcungh》 okmingz.

Lungzcungh ciuhgeq gingjsaek sengcingz gyaeundei, gingjyawj yinzvwnz lai raeuh, baenz vwnzvuz funghgingj lijyouzgih gaenq miz 1700 lai bi lizsij, Cungguek moq laebbaenz gvaqdaeuj daegbied dwg gyawj cib bi neix daeuj, ndaw gingjgih youh dem guh le “siengqsaek suliu boux caijsieng mizmingz cienbi Cuhgoz Lieng baijcuengq”、 roenconj hwnj bya caeuq ranzcaep dingjbya—Dwngzlungzgwz、Vwnzva Gun gingjgih daengj gingjdenj ndaej yawj gingj youh hawj vunz youq haenx, gingjgih ndaej coux vunz engq lai. Ndaw gingjgih byasang hophumx、gocoengz sang daemx mbwn, miz Byalungzsanh、Byalozsanh、Byageizhung daengj byasang, miz ranzhaz Cuhgoz、Vujhouzswz、Dingzfaexbekgeq、Dingzgothoq、nazdajndaem、Giuzgeqsiujhungz、Aencingj Roekgak、Daizngonz Ndaundeiq daengj, hawj vunz youq ndawde gamjsouh gij vwnzva lizsij gyaenanz de, gamjsouh daengz gij dungxcaiz naengzganq Cuhgoz Lieng, gawq ndaej cwxcaih yawj gingj guh’angq, youh ndaej yietnaiq soengsim, bouxhek sim’angq raix- caix.