Bi’gvaq, Denhdwngj Yen gig yawjnaek hong sanhnungz, ok cwngcwz, comz cienzngaenz, ca daegsaek, hawj hong sanhnungz laebdaeb ok diemjrongh, mizyauq coicaenh ginghci lajmbanj ndaej laebdaeb fazcanj. Bi’gvaq buenq bi gonq, aen yienh neix nungz linz muz yiz canjyez cungjcanjciz miz 5.36 ik maenz, doengzbeij demhwnj 6.9%, gij suzdu demhwnj haenx baiz youq daengx si daihsam.

Bi’gvaq, aen yienh neix lozsiz gak hangh cwngcwz hawj nungzminz giengz hawj nungzminz fouqmiz, vih vunzlai banh saehsaed saehndei. Dangqnaj, daengx yienh gaenq fatcuengq gak hangh boujdiep 6160.25 fanh maenz.

Daegsaek canjyez mboujduenh fazcanj. Bi’gvaq buenq bi gonq, aen yienh neix dingh le buek youhvei cwngcwz he, doiq nungzhoh dajndaem boujdiep cawx ceh(miuz) nem vafeiz. Oij、makit bi giet song baez、manh- daengjmbwn daengj dajndaem menciz demgya gig lai. Makit bi giet song baez haenx dajndaem menciz dabdaengz 2737 moux, nungzhoh dajndaem moix bi souhaeuj cingh- seuq miz 2 fanh maenz doxhwnj; manhdaengjmbwn dajndaem menciz dabdaengz 6.5 fanh moux, daengx yienh 13 aen yangh(cin) cungj fazcanj rangh sifan dan ndaem 50 moux doxhwnj haenx, guj lwgmanh moq cungjcanjlieng miz 3.25 fanh dun, canjciz mauhgvaq ik maenz.

Cizgiz fazcanj dangzoij canjyez. Bi’gvaq buenq bi gonq, daengx yienh ndaem oij menciz dabdaengz 9.5 fanh moux, saedyienh fazcanj moq, ndawde lai ndaem menciz beij bi’gyai demlai 2.1 fanh moux, baiz youq daengx si daih’it; doengz- seiz saedyienh dieg oij gauhyau dwkraemx menciz dabdaengz 1.012 fanh moux. (Vangz Lilanz)