Youq ndaw gyaiq Swconh Swngj Ahba Cangcuz Gyanghcuz Swcicouh Sunghbanh Yen, miz gizdieg gingjsaek gyaeundei yinx vunz gig mizmingz ndeu heuhguh Vangzlungz Mingzswng Fungh- gingjgih, gizneix gingjyawj daegbied、doenghyiengh fungfouq、swnghdai nyuenznduj、louzce ndaej ndei, gig miz cungyau gohyoz caeuq meijyoz gyaciz, dwg seiqgyaiq swnghvuzgenh baujhugih、guekgya AAAAA gaep lijyouzgih.

Giz gingjgiz cujyau ndaw Vangzlungz heuhguh Vangzlungz- gouh, couh youq laj dinbya Sezbaujdingj goengq bya ceiq sang Byaminzsanh, dwg diuz lueglaeg gaiva raez 7 goengleix、gvangq 300 mij baenzneix he, gizneix yienghbya ngutngaeu lumj duzlungz, ndigah youh heuhguh “Bya’ndojlungz”, youz Luegvangzlungz caeuq Lueg- mouzniz song bouhfaenh gyoeb- baenz. Vangzlungz miz Luegvangz- lungz、Luegdanhyinz、Sezbaujdingj daengj gingjgih, Luegmouzniz miz Raemxdiuqdat Cazgah caeuq Wdauhaij song aen gingjgih. Gwnz bya miz aen Vangzlungzsw gig mizmingz ndeu, ndigah aenmingz gingjgih couh ciuq an baenz. Ndaw gingjgih aeu daemz lai saek、byanae、lueglaeg、ndoengfaex “seiq cied” neix riuzmingz gwnzbiengz, dwg guek raeuz giz dog diegdumz byasang baujhu ndaej gig ndei ndeu.

Raemxnae caeuq raemx laj rin song cungj raemx neix lae gvaq Luegvangzlungz seiz, aenvih deng gizdieg lingqbingz、raemxlae git- menh、 ngafaex ndaekrin laengz- dangj daengj, gij dansonhgai ndaw raemx couh romcomz giet baenz ringaiva, ciemhciemh lienz baenz aen dem aen daemz lai saek, veh ok fuk veh geizheih ndeiyawj sengcingz ndeu, vunzlai couh heuh de guh “daemzhajsaek”. Gij daemz neix hunghung iqiq, miz sang miz daemq, yienghsiengq gak mbouj doxdoengz, gak saek gak yiengh, doxengq beij gyaeu, byaij youq ndawde, caen lumj haeuj daengz le diegsien Yauzciz nei.