Vahgangjgonq: Youq Vanz- gyangh Mauznanzcuz Swciyen, lwgsau okhaq cungj miz naxsoengq buenxsoengq, naxsoengq miz geij boux roxnaeuz geijcib boux, naxsoengq yied lai cawjranz yied miznaj. Gwnhoih liux le, gyoengq naxsoengq guhdoih dauq ranz, youq byonghroen, gyoengq boux- mbauq couh daeuj lanz naxsoengq ciengq fwen.

Sai:Ngoenzneix fukfaenh ndei,

Donhroen ndaej naxsoengq;

Caez yietnaiq gyang doengh,

Guh beij soengq hawj mwngz.

Ngoenzlwenz hwnj Hawngeih,

Raen gaiqreih hemj(remj) feiz;

Ngoenzneix fukfaenh ndei,

Donhroen ndaej naxsoengq.

Naxsoengq gwn nohbiz,

Naj haumbi dumhgyoengq;

Caez yietnaiq gyang doengh,

Guh beij soengq hawj mwngz.

Mbwk: Ngamq gwn hoihlaeuj ma,

Neix raennaj cix boih;

Donhroen naj doxdoiq,

Fwen gou noix gvaq mwngz.

Gwn laeuj bak cix haenq,

Dawz vanj maenh fwngz gvaz;

Ngamq gwn hoihlaeuj ma,

Neix raennaj cix boih.

Geij duz roeggaeq haen,

Duz rim gaen guhdoih;

Donhroen naj doxdoiq,

Beij gou noix gvaq mwngz.

Sai:Mwngz bae guh naxsoengq,

Ndaej garoengq laex vanz;

Ciengq beij youq cawjranz,

Miz youxnamz rox mbouj.

Guh buenx naj cix sang,

Guh gyang najbyak ndongq;

Mwngz bae guh naxsoengq,

Ndaej garoengq laexvanz.

Mwngz nax singbeij rwenz,

Naj maeq lwenq yiengh man;

Ciengq beij youq cawjranz,

Miz youxnamz rox mbouj.

Mbwk:Naxsoengq mbouj sou laex,

Cawjranz eiq nanz dang(dangj);

Ciengq beij miz bouxlangz,

Gou ngeix caengz baenz youx.

Boq deg vih guhcaemz,

Rengx gonh daemz rwed reih;

Naxsoengq mbouj sou laex,

Cawjranz eiq nanz dangj.

Doq raen feiz cix gouq,

Hangh raen boux cix bang;

Ciengq beij miz bouxlangz,

Gou ngeix caengz baenz youx.

(caengz sat)